بڈگام: کورونا گائڈلائن کی خلاف ورزی کرنے پر جرمانہ

بڈگام پولیس نے ضلع کے کئی علاقوں میں ماسک نہ پہننے والوں کے خلاف کاروائی کرتے ہوئے جرمانہ عائد کیا۔

ملک بھر کے ساتھ ساتھ ضلع بڈگام میں بھی گزشتہ کئی روز سے کورونا وائرس کے مثبت معاملوں میں اضافہ دیکھنے کو مل رہا ہے۔ کورونا کے معاملوں میں اضافے کے بعد بڈگام انتظامیہ متحرک ہو گئی ہے۔ لوگوں کو کورونا وائرس سے محفوط رکھنے کے لیے جگہ جگہ لوگوں کو بیدار کرنے کی کوشش کر رہی ہے۔

انتظامیہ لگاتار ماسک نہ لگانے والوں پر جرمانہ عائد کر رہی ہے۔ لوگوں کو کورونا وائرس سے محفوط رکھنے کے لیے اور انہیں ذمہدار بنانے کے لئے بڈگام پولیس بھی انتظامیہ کے شانہ بہ شانہ کام کر رہی ہے۔

بڈگام پولیس نے ضلع کے کئی علاقوں میں ماسک نہ پہننے والوں کے خلاف کاروائی کرتے ہوئے کئی افراد پر جرمانہ عائد کیا۔ آج بھی بڈگام پولیس نے اس مہم کو برقرار رکھتے ہوئے تین سو سے زائد افراد پر جرمانہ عائد کیا ہے۔

پولیس نے ان افراد پر قریب تیس ہزار روپیہ کا جرمانہ عائد کیا یے۔ ایس ایس پی بڈگام طاہر سلیم نے ای ٹی وی بھارت کو جانکاری دیتے ہوئے کہا کہ یہ مہم صرف لوگوں کی حفاظت کے لئے شروع کی گئی ہے تاکہ لوگ بیدار ہو جائیں اور کورونا وائرس کی ایس او پیز پر وہ عمل کریں۔

انہوں نے کہا کہ کورونا وائرس سے خود کو اور اپنے اہلخانہ کو محفوظ رکھنے کے لئے ایس او پیز پر عمل کرنا ضروری ہے۔ طاہر سلیم نے لوگوں سے اپیل کی ہے کہ وہ ماسک کا استعمال کریں تاکہ خود کو اور دوسروں کو کورونا وائرس سے محفوط رکھنے میں مدد حاصل ہو سکے۔