گولہ بارود کے ساتھ عسکریت پسند گرفتار

بڈگام پولیس نے البدر کے ایک ایکٹیو عسکریت پسند کو گرفتار کرنے کا دعویٰ کیا ہے۔ پولیس نے دعویٰ کیا ہے کہ گرفتار شدہ عسکریت پسند سے اسلحہ اور گولہ بارود برآمد کیا گیا ہے۔

پولیس نے کہا کہ ایک مخصوص اطلاع پر انہوں نے چرار شریف کے ناگ بل علاقے میں تلاشی کارروائی کی۔ پولیس اور سی آر پی ایف کی مشترکہ کارروائی کے دوران البدر کے عسکریت پسند کو گرفتار کر لیا گیا۔ گرفتار شدہ عسکریت پسند کی شناخت بٹپورہ ارونی اننت ناگ کے گلزار احمد بٹ کے طور پر ہوئی ہے۔

ابتدائی جانچ سے یہ معلوم ہوا ہے کہ گرفتار شدہ عسکریت پسند پاکستان میں سرگرم البدر عسکری تنظیم کے ہینڈلرس کے رابطے میں تھا۔ اس کے علاوہ وہ جنوبی کشمیر میں البدر کے عسکریت پسندوں کے بھی رابطے میں تھا۔

پولیس نے عسکریت پسند کے پاس سے ایک چینی پستول، پستول میگزین، پستول کے چودہ راؤنڈس، دو اے کے 47 میگزین، اٹھاون اے کے 47 راؤنڈس اور گچھ ممنوعہ اشیاء بھی بر آمد کی ہے۔ چرار شریف پولیس اسٹیشن میں اس سلسلے میں ایف آئی آر درج کی گئی ہے اور مزید تفتیش جاری ہے۔