بڈگام میں 32 سال بعد ہون کا اہتمام

ضلع بڈگام میں قریب بتیس سال بعد خصوصی ہون کا اہتمام کیا گیا، جس میں مقامی پنڈت برادری سے وابستہ عقیدت مندوں نے خصوصی پوجا پاٹ کے علاوہ جموں و کشمیر سمیت پورے عالم میں امن کے قیام اور وبائی امراض سے حفاظت کے لیے خصوصی دعائیں کیں۔

وسطی کشمیر کے بڈگام ضلع کے شیو مندر میں منگل کو قریب بتیس (32) سال بعد ایک خصوصی ہون کا اہتمام کیا گیا۔ ہون میں مقامی پنڈت برادری سے وابستہ عقیدتمندوں کے علاوہ مقامی مسلمانوں نے بھی شرکت کی۔

ہون میں شرکت کرنے والے افراد نے کورونا وائرس سے حفاظت کے علاوہ جموں و کشمیر سمیت پورے عالم میں امن و امان کے لئے بھی خصوصی دعائیں کیں۔

اس موقع پر کشمیری پنڈتوں کا کہنا تھا کہ 32 سال بعد ہون کا اہتمام کرنے سے انہیں کافی مسرت اور سکون حاصل ہوا ہے۔

ایک مقامی پنڈت نے کہا کہ ’’ہون کے ذریعے لوگوں تک یہ پیغام پہنچانا چاہتے ہیں کہ کشمیر بالکل محفوظ جگہ ہے اور جو لوگ یہاں سے بھاگ گئے تھے انہیں واپس آنا چاہئے۔‘‘

انہوں نے بیرون کشمیر رہائش پذیر مہاجر پنڈتوں سے واپس کشمیر لوٹنے کی اپیل بھی کی۔