بڈگام: آتشزدگی میں رہائشی مکان خاکستر، دو افراد زخمی

وسطی کشمیر کے ضلع بڈگام میں منگل اور بدھ کی درمیانی شب آتشزدگی کے دوران رہائشی مکان خاکستر ہو گیا۔ وہیں، آگ بجھانے کے دوران گیس سلینڈر پھٹنے سے دو افراد زخمی ہو گئے۔

ضلع بڈگام میں دوران شب ناربل کے سوزیٹھ علاقے میں فیاض احمد بٹ نام کے شخص کے رہائشی مکان میں آگ لگ گئی جس نے آناً فاناً پوری عمارت کو اپنی زد میں لے لیا۔

مقامی لوگوں نے آگ بجھانے کی کوشش کی تاہم مکان میں موجود رسوئی گیس کا سلینڈر پھٹ گیا جس سے مکان پوری طرح خاکستر ہونے کے علاوہ دو افراد بھی زخمی ہوگئے۔

زخمیوں کو فوری طور نزدیکی اسپتال پہنچایا گیا جہاں ان کی حالت مستحکم بتائی جا رہی ہے۔

زخمیوں ہونے والے افراد میں شوکت احمد بٹ اور عبد الاحد بٹ ساکنان سوزیٹھ شامل ہیں۔

آگ لگنے کی وجوہات کا فوری طور پر پتہ نہ چل سکا تاہم اس واقعہ میں لاکھوں کی املاک خاکستر ہو گئیں۔

پولیس نے اس ضمن میں معاملہ درج کر کے مزید کارروائی شروع کر دی ہے۔