DC Budgam Visits Magam ڈی بڈگام نے ماگام کا دورہ کرکے محرم کے انتظامات کا جائزہ لیا

ڈی سی بڈگام نے محرم کے انتظامات کا جائزہ لینے کے لیے ماگام کا دورہ کیا اور آر اینڈ بی، پی ایچ ای، پی ڈی ڈی، فوڈ ڈپارٹمنٹ کے افسران کو محرم کے پرامن انعقاد کے لیے تمام ممکنہ انتظامات کو یقینی بنانے کی ہدایت دی۔

بڈگام: ڈپٹی کمشنر (ڈی سی) بڈگام اکشے لابرو (آئی اے ایس) نے آج ماہ محرم الحرام کے انتظامات کا جائزہ لینے کے لیے ماگام کے علاقے کا دورہ کیا۔ انہوں نے ٹاون ہال ماگام میں محرم الحرام کے دوران مجالس اور جلوس کے انعقاد کے لیے کیے گئے انتظامات کا ایک اجلاس میں جائزہ لیا۔ ڈی سی کی صدارت میں منعقدہ اجلاس میں مختلف شیعہ تنظیموں کے نمائندوں، ماگام اور دیگر ملحقہ دیہات کے مقامی نمائندوں نے اپنے مسائل اٹھائے، عوام کے مطالبات سننے کے بعد ڈی سی نے متعلقہ افسران کو ہدایت کی کہ وہ تمام متعلقہ دیہاتوں کا دورہ کریں اور سڑکوں کی میکڈمائزیشن، بلاتعطل بجلی، پانی کی سپلائی اور خوراک اور سول سپلائی سے متعلق مسائل کے بروقت حل کو یقینی بنائیں۔

انہوں نے متعلقہ افسران کو یہ بھی ہدایت کی کہ وہ بروقت تعمیل رپورٹ پیش کریں اور راشن کی دستیابی کو یقینی بنائیں، آگ کی لکڑی کی تقسیم اور اسٹریٹ لائٹس کی بحالی اور تنصیب سمیت دیگر سہولیات جنگی بنیادوں پر کئے جائیں۔ ڈی سی نے متعلقہ افراد کو ہدایت دی کہ تمام نشاندہی شدہ مقامات پر پانی کے ٹینکوں کی سہولت کو یقینی بنایا جائے۔ میٹنگ میں صدر میونسپل کونسل ماگام مصطفی میر، ایس ڈی ایم بیرواہ توفیق اے غازی اور پی ڈی ڈی، پی ایچ ای، آر اینڈ بی، ریونیو، میونسپلٹی اور دیگر متعلقہ دفاتر کے سینئر افسران کے علاوہ ممتاز شیعہ تنظیموں کے نمائندوں نے شرکت کی۔