ڈی سی بڈگام نے بیروہ میں ترقیاتی کاموں کا جائزہ لیا

ڈی سی بڈگام شہباز مرزا نے سیل علاقے میں عوامی دربار منعقد کیا جس میں لوگوں نے علاقے میں درپیش مشکلات سے ڈی سی کو آگاہ کیا۔

ضلع ترقیاتی کمشنر بڈگام شہباز احمد مرزا نے ضلع کے بیروہ علاقے کا دورہ کرکے علاقے میں جاری ترقیاتی کاموں کا جائزہ لیا۔

شہباز مرزا نے بیروہ کے سیل علاقے میں زیر تعمیر پل پر جاری کام کا جائزہ لیا۔

ڈی سی بڈگام کو بتایا گیا کہ پل پر اسی (80) فیصد کام مکمل ہو چکا ہے جبکہ بقیہ کام دو ماہ سے بھی کم عرصے میں مکمل کر لیا جائے گا۔

قابل ذکر ہے کہ پل نالہ سکھ ناگ پر تعمیر کیا جا رہا ہے جس پر 6.48 کروڑ روپے لاگت کا تخمینہ ہے۔ مذکورہ پل بیروہ اور کھاگ کے کنڈی علاقوں کو زمینی راستے سے ملائے گا۔

دورے کے دوران ڈی سی بڈگام نے کہا کہ ’’ترقیاتی کاموں کو وقت پر پائے تکمیل تک پہنچانے کے لئے خصوصی توجہ مرکوز کی جا رہی ہے۔‘‘

شہباز مرزا نے سیل علاقے میں عوامی دربار بھی منعقد کیا جس میں لوگوں نے علاقے میں درپیش مشکلات سے ڈی سی کو آگاہ کیا۔

ڈی سی بڈگام نے لوگوں کو یقین دلایا کہ انکے جائز مطالبات کو جلد پورا کیا جائے گا۔

ڈی سی نے دورے کے دوران اروا نامی گاؤں کا بھی دورہ کیا اور یہاں 5.23 کروڑ روپے لاگت سے تعمیر کیے جا رہے پل کے تعمیراتی کام کا جائزہ لیا۔

ضلع ترقیاتی کمشنر نے تعمیراتی کام میں سرعت لائے جانے پر زور دیا۔