لاک ڈاؤن کی خلاف ورزی، بڈگام میں چار ڈرائیور گرفتار، سولہ گاڑیاں ضبط

کرفیو کی خلاف ورزی کرنے والے چار ڈرائیوروں کی گرفتار پر پولیس کا کہنا ہے کہ جن ٹپروں کو سیز کیا گیا ہے وہ اینٹیں لے جا رہے تھے اور ان کو اینٹوں سمیت سیز کیا گیا ہے۔

کورونا وائرس کے معاملوں میں لگاتار اضافے کے بعد جموں و کشمیر میں کورونا کرفیو کا نفاذ جاری ہے۔ لوگوں سے لگاتار یہی اپیل کی جارہی ہے کہ غیر ضروری اپنے گھروں سے باہر نہ آئیں اور جو حکم نامہ کی خلاف ورزی کرے گا اس کے خلاف کارروائی کی جائے گی۔

اس دوران کئی ایسے افراد ہیں جو اپنے گھروں سے غیر ضروری نکلتے ہیں جن کے خلاف بڈگام پولیس نے کارروائی کی اور کرفیو کی خلاف ورزی کرنے والے چار ڈرائیوروں کو گرفتار کیا۔ اس کے علاوہ پولیس نے سولہ گاڑیاں ضبط کیں۔

پولیس کا کہنا ہے کہ یہ افراد کورونا کرفیو کی خلاف ورزی کررہے تھے۔ انہوں نے یہ بھی بتایا کہ جن ٹپروں کو سیز کیا گیا ہے وہ اینٹیں لے جا رہے تھے اور ان کو اینٹوں سمیت سیز کیا گیا ہے۔

آپکو بتادیں وادی بھر کی طرح ضلع بڈگام میں بھی کورونا وائرس کے معاملوں میں لگاتار اضافہ دیکھنے کو مل رہا ہے۔ یہاں کورونا کرفیو کا عمل بھی سختی سے نافذ ہے۔ پولیس نے جگہ جگہ ناکہ بندی کی ہے اور صرف ایمرجنسی میں ہی لوگوں کو چلنے پھرنے کی اجازت دی جا رہی ہے۔