بڈگام پولیس نے کشمیر پریمیئر لیگ کی فاتح ٹیم کو اعزاز سے نوازا

کھلاڑیوں کی حوصلہ افزائی اور نوجوانوں میں کھیلوں کی سرگرمیوں کے شوق کو بڑھانے کے لئے بڈگام پولیس نے بدھ کو کشمیر پریمیئر لیگ کی فاتح ٹیم کو اعزاز سے نوازا۔

ڈسٹرک پولیس لائنز بڈگام میں منعقدہ ایک تقریب کے دوران بڈگام پولیس نے ’’کشمیر پریمیئر لیگ‘‘ اپنے نام کرنے والی ’’بڈگام بریوز‘‘ ٹیم کے کھلاڑیوں کو اعزاز سے نوازا۔

تقریب کے دوران ایس ایس پی بڈگام طاہر سلیم نے خطاب کرتے ہوئے کھلاڑیوں کو مبارکباد پیش کی۔ انہوں نے کھلاڑیوں کو تلقین کی کہ دیگر کھیلوں میں بھی دیگر افراد کو شامل کرنے کی ترغیب دیں تاکہ نوجوانوں کو کھیل کود کی مختلف سرگرمیوں کی جانب راغب کیا جاسکے۔

طاہر سلیم نے کہا کہ کھیل کود کی سرگرمیاں کسی بھی فرد کی توانائی کو منفی قوتوں سے دور رکھنے کے لئے انتہائی اہم ہیں۔

بڈگام بریوز کے کھلاڑیوں کو ایس ایس پی نے اسناد اور دیگر اعزازات سے نوازا۔ وہیں انہوں نے کھلاڑیوں کو پولیس کی جانب سے منعقد کی جارہی کھیل کود کی مختلف سرگرمیوں میں حصہ لے کر استفادہ کرنے کی بھی تلقین کی۔

واضح رہے کہ ’’کشمیر پریمیئر لیگ 2019 ‘‘ کو فوج نے منعقد کیا تھا جس میں وادیٔ کشمیر کے مختلف اضلاع کی ایک سو چھیانوے ٹیموں نے حصہ لیا تھا۔ تاہم فائنل مقابلے میں ’’بڈگام بریوز‘‘ نے ’’شاہی شوپیان‘‘ کو ہراکر ٹورنامنٹ اپنے نام کیا۔