بڈگام: منشیات فروشی کے الزام میں ایک شخص گرفتار

بڈگام پولیس نے نوہر، چرار شریف کے معراج الدین شاہ کو منشیات فروشی کے الزام میں گرفتار کر کے ان کے خلاف مقدامہ دائر کیا ہے۔

چرار شریف کی پولیس کے مطابق اطلاع کی بنیاد پر انہوں نے کارروائی کرتے ہوئے ایکزیکٹیو مجسٹریٹ (فرسٹ کلاس) چرار شریف کی موجودگی میں منشیات فروشی کے ملزم کے گھر پر چھاپہ مارا۔

پولیس بیان کے مطابق چرار شریف سے تعلق رکھنے والے معراج الدین شاہ کے گھر سے چھاپے کے دوران نو سو گرام چرس جیسی شئی بر آمد کی گئی۔

بڈگام پولیس نے دعویٰ کیا کہ تحقیقات کے دوران انہیں گرفتار کیے گئے شخص کے منشیات فروش ہونے کے پختہ ثوب حاصل ہوئے ہیں۔ انہوں نے کہا کہ گرفتار شخص منشیات فروخت کر کے کافی منافع حاصل کر رہا ہے۔

پولیس نے منشیات فروش کو گرفتار کر کے اس کے خلاف ایف آئی آر درج کر لی ہے۔

واضح رہے گزشتہ چند ماہ سے پولیس نے منشیات کے خلاف مہم کو تیز کر دیا ہے۔ اس دوران بڈگام پولیس نے گزشتہ چند ماہ کے دوران تیس سے زائد ملزمین کو گرفتار کیا ہے۔

دریں اثنا جموں و کشمیر پولیس نے منشیات کا قلع قمع کرنے کے لیے عوام سے تعاون طلب کیا ہے۔