مزدور نقل مکانی کرنے کو مجبور

انتظامیہ کے جانب سے مدد نہیں ملنے پر سائیکل سے ہی گھر کے لئے روانہ ہو گئے مزدور ۔

گیا: حکومت و انتظامیہ گزشتہ کئی روز سے یہ دعوہ کر رہی ہے کہ مزدوروں کو ان کے گھر تک بھیجا جائے گا، اور راستے میں ان کے لئے تمام سہولیات فراہم کی جائے گی، تاہم ایسا ہو نہیں رہا ہے۔ جس کی وجہ سے الگ الگ طرح سے نقل مکانی کرنے کو مجبور ہیں۔

جانکاری کے مطابق ضلع گیا سے آج مزدوروں کی ایک جماعت سائیکل سے اپنے آبائی وطن بہرائچ کے لئے روانہ ہوئے ہیں، اس دوران مزدوروں کی ضلع گیا ہیڈکواٹر سے قریب چالیس کلومیٹر دور گیا ڈوبھی روڈ پر ای ٹی وی بھارت کے نمائندہ سے ملاقات ہوئی، یہ مزدور گیا سے سفر کرنے کے بعد ڈوبھی کے پاس سڑک کے کنارے کچھ دیر کے لئے آرام کر رہے تھے ، اور چپس کھاکر بھوک مٹارہے تھے ۔

ای ٹی وی بھارت کے نمائندے نے جب ان مزدوروں سے سڑک کے کنارے بیٹھے ہونے کی وجہ پوچھی تو پتہ چلاکہ یہ مزدور اپنے آبائی گھر کے لئے سائیکل سے روانہ ہوئے ہیں۔ اور یہ گیا ہی میں کام کرتے تھے ۔

جب نمائندہ نے ان سے سائیکل سے اتنی لمبی سفر طے کرنے کے بارے میں پوچھا تو مزدوروں نے بتایا کہ لاک ڈاون کب کھلے گا اس کی کوئی جانکاری نہیں ہے، لیکن جب بھی کھلے گا تب تک ہم بھوک سے مر چکے ہوں گے، کیونکہ جس جگہ ہم کام کرتے ہیں وہاں کے مالک نے ہمیں مدد دینے سے منع کر دیا ہے۔

اس دوران مزدور اصغرعلی نے بتایا کہ گیا بیتھو کنڈی نوادہ سے بہرائج جارہے ہیں، انتظامیہ سے مدد کا مطالبہ کیا تھا۔ لیکن کسی طرح کی مدد نہیں ملی اس لئے اپنے ساتھیوں کے ساتھ سائیکل سے گھرواپس ہونے کا فیصلہ کیا ہے ۔

وہیں مزدور امتیاز علی نے بتایا کہ پیسے ختم ہو گئے تھے تو گھر والوں نے قرض لے کر پیسے بھیجے ہیں۔ جس سے سائیکل خرید کر گھر جا رہے ہیں، مزدوروں کے مطابق انہیں گھر پہنچنے میں ایک ہفتے سے زیادہ وقت لگ سکتا ہے۔