Haj 2023 خلوص دل سے عازمین حج کی خدمت کرتے ہیں، صفائی ملازمین

گیا ہوائی اڈہ پر صفائی ملازمین کی کارکردگی اوران کے کام قابل تعریف ہیں۔ ان ملازمین کا کہنا ہے کہ وہ خدمت کے جذبے سے کام کرتے ہیں اور حاجیوں کی خدمت کرنا ان کی خوش نصیبی ہے۔

گیا:ریاست بہار کے گیا امبارکیشن سے عازمین حج کی روانگی کا سلسلہ جاری ہے۔ اس دوران یہاں عازمین حج کے لیے کئی طرح کی سہولت فراہم کی گئی ہے۔ ساتھ ہی صفائی کا بھی بہترین انتظام ہے۔ بودھ گیا نگر پریشد کے صفائی اہلکاروں کی جانب سے بھی عازمین حج کی خدمت میں کوئی کسر نہیں چھوڑی جارہی ہے۔

صفائی اہلکاروں کا کہنا ہے کہ وہ خدمت کا جذبہ رکھتے ہیں۔ ان کے اس جذبہ اور کام کی سراہنا عازمین حج بھی کرتے ہیں۔ انہیں دعاؤں سے نواز تے ہیں۔ یہ مقدس سفر ہے۔ اس لیے اس میں کوئی کوتاہیوں کا سوال پیدا نہیں ہوتا ہے۔ صفائی اہلکاروں کا ماننا ہے کہ حاجیوں کے لئے امبارکیشن پوائنٹ کا ہونا گیا کے لیے باعث فخر ہے۔

انہوں نے کہا کہ اس کو کامیابی کے ساتھ اختتام کرنا ہماری ذمہ داری ہے صفائی کرنے میں کوئی بھی ملازم پیچھے نہیں ہے۔ سبھی ایک دوسرے پر سبقت حاصل کرنے کی کوشش کرتے ہیں رضاکاروں کے ساتھ یہ صفائی ملازم بھی رات بھرموجود ہوتے ہیں۔ وہ رات میں تین بار چھاڑو لگانے کے ساتھ گندگی کو دور کرتے رہتے ہیں۔ان کی صفائی کی جھلک یہ ہے۔ کوڑادان بھی باہر سے چمکتا رہتا ہے۔

رضاکار موتی کریمی کہتے ہیں کہ جب کسی کو خدمت کا جذبہ ہوجاتاہے تو وہ صرف ڈیوٹی کو انجام نہیں دیتا بلکہ وہ خلوص دل اور نیت سے کام کرتاہے یہ ڈیوٹی سے بڑھ کر کاموں کو انجام دیتے ہیں۔