'اردو زبان نے انسانیت کے لئے بڑا کام کیا'

بہار میں اردو زبان کے فروغ کے لیے اردو سیمینار منعقد کیا گیا، اس دوران نئی نسل کو اردو سے جوڑنے پر زور دیا گیا۔

ریاست بہار کے گیا میں ضلع پریشد کے کانفرنس ہال میں اردو زبان سیل کی جانب سے ایک سیمینار منعقد کیا گیا، سیمینار کا موضوع فروغ اردو زبان پر مبنی تھا۔

افتتاحی تقریب میں ضلع گیا کے ڈسٹرک مجسٹریٹ ابھشیک کمار سنگھ مہمان خصوصی رہے، پروگرام کی صدارت پروفیسر محفوظ الحسن نے کی۔

سیمینار میں موجود افراد کو خطاب کرتے ہوئے ڈسٹرک مجسٹریٹ ابھشیک کمار سنگھ نے اردو زباں کو احساسات وجذبات کو بہتر اور سنجیدگی ساتھ بیان کرنے کی طاقت فراہم کرنے والی زبان بتاتے ہوئے کہا 'اردو زبان نے انسانیت کے لئے بڑا کام کیا ہے'۔

انہوں نے کہا 'اردو ایک ایسی زبان ہے جس کا استعمال ہرشعبے میں ہوا ہے، اس کے الفاظ ہندی سنیما سے لے کر غزل وشاعری اور ہرجگہ ملیں گے'۔

انہوں نے اردو سے اپنی ذاتی قربت اور واقفیت کا اظہار کرتے ہوئے کہا 'انہوں نے اپنے اسکولی تعلیم میں اردو کو پڑھا اور سمجھا ہے، وہ اردو میں اپنے گھر والوں کو خط بھی لکھا کرتے تھے۔ زبان کی مقبولیت کی وجہ یہ ہے کہ اس زبان میں جوالفاظ کی طاقت ہے وہ کسی اور زبان میں نہیں ہے'۔

حالانکہ انہوں نے موجودہ وقت میں اردو کے تئیں عوامی دلچسپی گھٹنے پرتشویش کااظہار بھی کیا اور کہا 'آج اردو کے فروغ کو لے کر متعدد مسائل اور چیلنجز درپیش ہیں، موجودہ وقت میں جو تکنیکی ایجاد کے ساتھ جو تبدیلیاں آنی چاہئے تھی وہ نہیں ہوسکی۔ وقت کے ساتھ زبانوں کو بھی تکنیک سے جوڑا جانا انتہائی ضروری ہے'۔

نئی نسل کو اردو سے جوڑنے پر بھی انہوں نے زور دیا اور کہا 'ہر زبان کی ایک اہمیت ہوتی ہے۔ انگریزی کے تئیں جو دلچسپی بڑھی ہے وہ غلط نہیں ہے تاہم اسکے ساتھ اپنی زبان اردو کے ساتھ بھی اسی شدت کے ساتھ دلچسپی ہونی چاہئے'۔

انہوں نے کہا 'پہلے ہرطبقے کے لوگوں نے اسے اپنایا ہے اور لوگ بڑے فخر کے ساتھ اردو پڑھتے اور عام گفتگو کے استعمال میں لاتے تھے لیکن آج ہماری دلچسپی کم ہوئی ہے'۔

وہیں اردو سیل کے انچارج سلیم انصاری نے کہا 'اردو کو اعلی مقام پر پہچانے کے لئے ادبی استعمال سے زیادہ عام بول چال پر دھیان دینے کی ضرورت ہے۔ انہوں نے انتظامیہ کی جانب سے اردو کے فروغ کے لئے ٹھوس قدم اٹھائے جانے کی بات کہی۔ اور اردو کے فروغ کے لئے سبھی کو مل کر کام کرنے کی ضرورت بتایا'۔