Gaya Police گیا میں کشیدگی پھیلانے کے الزام میں دو افراد گرفتار

ریاست بہارکے ضلع گیا میں رام نومی اور رمضان کے موقع پرکشیدگی پھیلانے کے الزام میں دو افراد کو گرفتار کیا گیا ہے۔ ان پر الزام ہے کہ انہوں نے 27 مارچ کو ایک معمولی جھگڑے کو فرقہ رنگ دیا تھا تاہم پولیس نے بروقت کاروائی کرتے ہوئے کچھ پر قابو پالیا تھا۔

گیا پولیس نے رام نومی اور رمضان کے موقع پر کشیدگی پیدا کرنے کے الزام میں دو افراد کو گرفتار کیا ہے ، گزشتہ 27مارچ کو بنیاد گنج تھانہ حلقہ کے علی پور گاوں میں دو فرقے کے درمیان تنازع ہوگیا تھا، دونوں فرقے درمیان سنگ باری بھی ہوئی تھی۔ جس میں کچھ افراد کو معمولی چوٹیں بھی آئی تھیں، اس معاملے کو سنجیدگی سے لیتے ہوئے ضلع پولیس نے نا صرف حالات کو قابو میں کیا تھا،بلکہ اس معاملے میں دو افراد کو گرفتار کرلیا ہے۔ ایس ایس آشیش کمار بھارتی نے کہاکہ چونکہ رمضان اور نوراتری کا تہوار ایک ساتھ منایا جارہا ہے، تو ایسے میں ماحول کو خراب کرنے کی کوشش کے تحت علی پور میں ایک معمولی تنازعہ کو فرقہ وارانہ رنگ دینے کی کوشش کی گئی لیکن پولیس کی بروقت کارروائی کی وجہ سے حالات پرامن رہے۔

انہوں نے بتایا کہ ڈی ایس پی کی قیادت میں پورے علاقے پر نگرانی رکھی جارہی ہے۔ فلیگ مارچ بھی کیا گیا ہے ،اور احتیاط کے طور پر مزید فورسز کو تعینات کیا گیا ہے۔ اس معاملے میں محمد شہنواز عالم ابن کلومیاں اور ساگر کمار ابن سنجے ساو علی پور تھانہ بنیاد گنج کو گرفتار کرلیا گیا ہے۔ پولیس نے بتایا باقی مجرموں کو بھی بہت جلد پکڑ لیا جائے گا۔ مزید کہا کہ اس طرح کی حرکت کرنے والوں کو بخشا نہیں جائے گا۔ سخت سے سخت سزا دی جائے گی۔