گیا: ریاست بہار کے ضلع گیا کی جامع مسجد کے زیر اہتمام چلنے والے بی پی ایس سی کوچنگ سینٹر نے نمایاں رزلٹ دیا ہے۔ اس کوچنگ سے پڑھنے والے دو امیدواروں نے سی ڈی پی او ' چائلڈ ڈیولپمنٹ پروجیکٹ آفیسر ' کے امتحان میں کامیابی حاصل کی ہے۔ ان میں ایک شگفتہ پروین اور دوسرے ارشد امام ہیں، ان دونوں نے جامع مسجد کوچنگ سینٹر سے ہی تیاری کی تھی۔ جامع مسجد کوچنگ سینٹر کا یہ پہلا رزلٹ ہے جس میں دو امیدواروں نے کامیابی حاصل کی ہے۔
سنہ 2022 میں جامعہ مسجد کوچنگ سینٹر کا قیام عمل میں آیا تھا۔ اس برس دو امیدواروں کی کامیابی پر جامع مسجد کوچنگ سینٹر انتظامیہ بھی پرجوش ہے اور اس سے دوسرے امیدوار جو یہاں سے تیاری کر رہے ہیں ان کے بھی حوصلے بڑھے ہیں۔کوچنگ سینٹر میں آج ان دونوں کا والہانہ خیر مقدم ہوا اور ان کی پوری محنت اور کامیابی کے تعلق سے دوسرے امیدواروں کو بتایا گیا کہ انہوں نے کس طرح یہاں تیاری کی اور کتنا وقت انہوں نے تیاری میں خرچ کیا ؟ کن کن پریشانیوں اور مشکلات کا سامنا انہیں کرنا پڑا ہے۔