حکومت، مدارس کے طلباء کو اسکولوں کے طلبا کے مساوی بنائے گی: سفینہ نور

وزیراعلیٰ نتیش کمار نے تعلیم نو بالغاں کو ترجیحات میں شامل کرتے ہوئے تمام تر اسباب مہیا کرانے کا نظم بھی کیا ہے۔ حکومت کے اعلی افسران سرگرم ہیں۔ مدارس کے طلباء کو عصری تعلیم سے آراستہ کر ان کے اندر خود اعتمادی پیدا کرنے اور انہیں مقابلہ جاتی امتحانات کے لیے تیار کرنے کی ہر ممکن کوشش کی گئی ہے۔

ملٹی پارٹنر پروجکٹ کے تحت مدارس کے بچوں کو عصری تقاضوں سے آراستہ کر نے اور انہیں مجودہ عہد کے تعلیمی نصاب سے بحراور کرنے کے لیے ریاستی حکومت نے جامعہ ملیہ اسلامیہ دہلی اور مولانا آزاد یونیورسٹی کے اشتراک سے یو این ایف پی اے کی معاونت میں مدارس کے طلباء کو تربیت دینے کا نظم کیا ہے۔

یہ پروگرام مدرسہ بورڈ کا تھا مگر بورڈ کے چیئرمین ندارت تھے جبکہ محکمہ داخلہ کے ایڈیشنل چیف سیکریٹری عامر سبحانی اور محکمہ اقلیتی فلاح کی سکریٹری سفینہ نور اردو اقلیتی کمیشن کے چیئرمین یونس حکیم سرگرم نظر آئے۔ تعلیم نوبالغاں کو کامیاب بنانے کے لیے حکومت نے صوبائی سطح پر ریسورس سینٹر قائم کرنے کا اعلان کیا ہے۔

محکمہ داخلہ کے ایڈیشنل چیف سکریٹری عامر سبحانی نے کہا کہ تعلیم نوبالغاں پروگرام کامیاب ہوگا۔ مدرسہ کے اساتذہ اور طلباء کو تربیت دی جائے گی۔ انہیں عصری تعلیم سے آراستہ کیا جائے گا۔

محکمہ اقلیتی فلاح کی سکریٹری سفینہ نور نے کہا کہ حکومت نے بہار مدارس کے طلباء کو عصری تعلیم سے آراستہ کرکے ان کے اندر خود اعتمادی پیدا کرنے اور انہیں مقابلہ جاتی امتحانات کے لیے تیار کرنے کا فیصلہ کیا ہے۔ انہوں نے کہا کہ مدرسوں کو تمام تر بنیادی سہولیات کی فراہمی کے لیے حکومت پابند عہد ہے۔