اگر رام چاہتے تو کیا اپنا مندر نہیں بناسکتے، رام مندر بی جے پی کی سیاست: تیجسوی یادو

Bihar Dy CM criticizes Modi govt on various issues ریاست بہار کے ضلع مدھوبنی میں نائب وزیر اعلی تیجسوی یادو نے ملک بھر میں بے روزگاری، مہنگائی، کالا دھن، رام مندر کی تعمیر اور دیگر امور پر مودی حکومت پر سخت نکتہ چینی کی ہے۔

مدھوبنی: بہار کے نائب وزیر اعلی تیجسوی یادو نے بدھ کو مدھوبنی میں ایک تقریب سے خطاب کرتے ہوئے کہا کہ ایودھیا میں ہزاروں کروڑ روپے خرچ کر کے بھگوان رام کا مندر بنایا جا رہا ہے۔ رام مندر، مودی جی کی ضرورت ہے۔ اگر رام چاہتے تو کیا اپنا مندر نہ بناتے؟ مودی کو رام جی سے بڑا کہا جا رہا ہے۔ یہ سب فضول باتیں ہیں۔ دل و دماغ میں ایمان ہونا چاہیے۔ نیت صاف ہونی چاہیے۔ تیجسوی یادو سابق ایم پی آنجہانی پروفیسر رام دیو بھنڈاری کے مجسمے کی نقاب کشائی کے لیے مدھوبنی ضلع کے جھانجھر پور آئے تھے۔

انہوں نے وزیر اعظم نریندر مودی پر سخت نکتہ چینی کی ہے۔ انہوں نے کہا کہ مودی جی صرف تقریریں کرتے ہیں، انہوں نے کیا کام کیا ہے؟ ریل سمیت کئی چیزوں کو فروخت کر دیا گیا ہے۔ انہوں نے غریبوں کے کھاتے میں 15 لاکھ روپے دینے کی بات کی تھی۔ کالا دھن ابھی تک نہیں آیا۔ للت مودی، نیرو مودی جیسے لوگ ہزاروں کروڑوں روپے لوٹ کر بھاگ گئے اور چوکیدار نے کیا کیا؟۔

تیجسوی نے کہا کہ ہم مسائل پر بات کرتے ہیں۔ ہماری لڑائی مودی جی سے نہیں اور نہ ہی امیت شاہ جی سے۔ ہماری لڑائی مسائل کی لڑائی ہے۔ ہم مسائل پر بات کرتے ہیں، جب ہم لوگ مسائل پر سوال کرتے ہیں تو کہتے ہیں کہ ہم غلط کر رہے ہیں۔ انہوں نے کہا کہ مخلوط حکومت نے ایک دن میں 1.25 لاکھ لوگوں کو روزگار فراہم کرنے کا کام کیا ہے۔ پھر اساتذہ کو نوکریاں دی جارہی ہیں۔ محکمہ صحت میں تقریباً 1.5 لاکھ روپے کی نوکریاں دی جا رہی ہیں۔ اتنی ترقی ہو رہی ہے۔

واضح رہےکہ اپوزیشن کی جانب سے مودی حکومت پر سالانہ دو کروڑ نوکریاں دینے اور کالا دھن واپس لانے اور دیگر وعدوں کو پورا نہ کا الزام عائد کیا جاتا ہے۔ ملک بھر میں بے روزگاری، مہنگائی پر مودی حکومت پر سخت نکتہ چینی کی جاتی ہے۔