امیر شریعت انتخاب: رانچی سے پہنچے 90 سالہ عالم دین سے گفتگو

ریاست بہار کے دار الحکومت پٹنہ میں امیر شریعت کے انتخاب کے لیے بہار اُڑیسہ و جھارکھنڈ سے ارباب حل و عقد کے 851 اراکین مرکزی دفتر پہنچے ہیں۔

امیر شریعت کے انتخاب کے اجلاس میں شرکت کے لیے رانچی کے عمر رسیدہ عالم دین مولانا عبد الحئی رحمانی بھی پہنچے۔

مولانا عبدالحئی کینسر جیسے موذی مرض میں مبتلا ہیں، حضرت موصوف بذریعہ ایمبولینس پٹنہ پہنچے ہیں۔

ان کا کہنا ہے کہ 'انہوں نے حضرت امیر شریعت رابعؒ سے لے کر اب تک تمام امیروں کے انتخاب میں شرکت کی ہے اور اب ان کی دلی خواہش ہے کہ اس بار بھی امیر شریعت کا انتخاب اتفاق رائے سے بحسن و خوبی انجام پذیر ہو۔

مولانا عبد الحئی رحمانی نے کہا کہ 'امارت شرعیہ کی ترقی میں جتنے بھی امراء شریعت گزرے ہیں تمام کا اہم کردار ہے۔ یہ امارت شرعیہ کا وقار ہے کہ جتنی شہرت اس ادارہ کی ہے، ویسی کسی کی نہیں ہے۔'

انہوں نے مزید کہا کہ 'میری خواہش ہے کہ جو بھی امیر منتخب ہو وہ اتفاق رائے سے ہو تاکہ قوم و ملت کو ایک پیغام جائے۔'