طلباکی ناراضگی کی خبر ای ٹی وی بھارت اردو نے ترجیحی بنیاد شائع کی تھی، جس کے بعد انتظامیہ حرکت میں آگئی اور طلبا کو بلاکر باقی انعامی رقم دے دی۔
طلبا کو پوری انعامی رقم ملنے پر خوش، دیکھیں ویڈیو ضلع انتظامیہ نے ای ٹی وی بھارت کی خبر پر نوٹس لیتے ہوئے جن طلباء کو انعامی رقم پورے نہیں ملے تھے ان تمام طلبا کو بلا کر ضلع کلکٹریٹ میں باقی انعامی رقم و سند دیئے گئے، جس سے طلباء میں خوشی کی لہر دیکھی گئی ۔ اس معاملے کو اٹھانے اور ضلع انتظامیہ تک پہنچانے میں طلبانے ای ٹی وی بھارت اردو کا شکریہ ادا کیاہے۔
دراصل معاملہ یہ تھا کہ موتیہاری میں ریاستی سطح پر منعقد ہونے والے پروگرام میں ارریہ سے فنکاروں کا منتخب کیا جانا تھا، جس کے لیے ضلع کے پنچایت و بلاک سطح سے اسکولی طلبا و دیگر تنظیموں کے فنکاروں نے مختلف فن میں اپنے فن کا مظاہرہ کیا تھا، جسے بہترین مظاہرہ کی درجہ بندی کرتے ہوئے اول دوم سوم پوزیشن دیا گیا تھا۔
ان لوگوں کو اعلان کے مطابق ضلع انتظامیہ کی جانب سے انعامی رقم دئے جانے تھے۔ اول مقام والوں کو ایک ہزار روپے و دوم پوزیشن والوں کو پانچ سو روپے دئے جانے تھے مگر پروگرام میں دئے گئے بند لفافے میں اول مقام والوں کو ایک ہزار کے بجائے پانچ سو روپے ہی نکلے، جس سے طلبانے شدید غم و غصے کا اظہار کیا تھا۔ جبکہ دوئم پوزیشن والوں کو کوئی رقم نہیں دی گئی تھی، جس کا ازالہ کرتے ہوئے ایسے تمام اول و دوم پوزیشن والوں کو انعامی رقم دیئے گئے۔
طلبانے اس موقع پر ضلع انتظامیہ کا شکریہ ادا کرتے ہوئے کہا کہ آج ہم خوش ہیں کہ ہماری محنت اور جذبات کی ضلع انتظامیہ نے قدر کی اور کیے گئے وعدے کے مطابق انعامی رقم و سند سے نوازا۔
سماجی کارکن مونا لیسا مکھر جی نے بھی ضلع انتظامیہ کے اس قدم کی ستائش کرتے ہوئے کہا کہ وقت رہتے ضلع انتظامیہ نے اس جانب توجہ دی اور آج بچوں میں خوشی دیکھی جا رہی ہے۔
وہیں ضلع کھیل آفیسر شمبھو کمار نے کہا کہ پروگرام مینجمنٹ سطح سے کچھ کمی رہ گئی تھی، جس کی وجہ سے یہ معاملہ پیش آیا۔ جسے درست کر لیا گیا اور جن بچوں کو پورے رقم نہیں ملے یا چھوٹ گئے تھے، تمام لوگوں کو انعامی رقم دئے گئے، ساتھ ہی سند بھی پیش کئے گئے۔
