سولار لائٹ پروڈکٹ یونٹ لگانے کی سمت میں بھی کام کریں: نتیش کمار

پریزنٹیشن کے بعد وزیر اعلیٰ نے کہا کہ ہر پنچایت میں سولار اسٹریٹ لائٹ لگائے جانے کے سلسلہ میں سروے بہتر طریقہ سے کرلیں۔

وزیر اعلیٰ نتیش کمار کے سامنے امرت لال مینا نے پنچایت راج محکمہ کے ذریعہ ویڈیو کانفرنسنگ کے توسط سے ’وزیر اعلیٰ رورل سولار اسٹریٹ لائٹ منصوبہ‘ سے متعلق پریزنٹیشن دیا۔

پنچایت راج محکمہ کے ایڈیشنل چیف سیکریٹری امرت لال مینا نے پریزنٹیشن کے ذریعہ ’وزیر اعلیٰ رورل سولر اسٹریٹ لائٹ منصوبہ‘ سے متعلق تفصیلی جانکاری دی۔ انہوں نے اس کے ہدف، اس کی تنصیب کے لیے مقامات کا انتخاب، رکھ رکھاﺅ، مالی مینجمنٹ وغیرہ کے بارے میں جانکار دی۔ ایڈیشنل چیف سیکریٹری نے 15ویں مالیاتی کمیشن کی سفارشات پر عمل درآمد کے بارے میں بھی جانکاری دی۔ انہوں نے اس کی رقم کے استعمال کے تعلق سے مجوزہ سرگرمیوں کی تفصیلی جانکاری دی۔

پریزنٹیشن کے بعد وزیر اعلیٰ نے کہا کہ ہر پنچایت میں سولار اسٹریٹ لائٹ لگائے جانے کے سلسلہ میں سروے بہتر طریقہ سے کرلیں۔ تمام مقامات کا انتخاب ایک ہی ساتھ کرلیں۔ سولار اسٹریٹ لائٹ کو لگائے جانے کے دوران جگہ کا انتخاب اس طریقہ سے ہو کہ کوئی اس منصوبہ سے محروم نہ رہے۔

یو این آئی