Bihar Govt بہار حکومت نے مدرسہ بورڈ اور اقلیتی کمیشن کے چیئرمین مقرر کیے

برسوں بعد مدرسہ بورڈ اور اقلیتی کمیشن کی کمیٹیوں کو پر کیا گیا ہے۔ سلیم پرویز کو مدرسہ بورڈ کا چیئرمین مقرر کیا گیا ہے۔ جب کہ اقلیتی کمیشن کے نئے چیئرمین ریاض الحق ہوں گے۔ ایک کا تعلق جی ڈی یو سے ہے جب کہ دوسرے کا تعلق آر جے ڈی سے ہے۔

گیا:ریاست بہار میں طویل انتظار کے بعد خالی پڑے بورڈ اور کمیٹیوں کو پر کرنے کا سلسلہ شروع ہو گیا ہے۔ حکومت نے مدرسہ بورڈ اور اقلیتی کمیشن کے چیئرمین کے ناموں کا نوٹیفکیشن جاری کردیا ہے۔ ساتھ ہی اراکین کے ناموں کی تجویز پر بھی مہر لگا دی ہے حالانکہ ابھی بھی بہار میں کئی بورڈ اور کمیٹیوں کے عہدے خالی ہیں جس کو لے کر گہما گہمی ہے۔ مدرسہ بورڈ کے تعلق سے محکمہ تعلیم نے اس سلسلے میں نوٹیفیکیشن جاری کر دیا ہے۔ جاری نوٹیفکیشن کے مطابق سلیم پرویز کو بہار اسٹیٹ مدرسہ ایجوکیشن بورڈ کا نیا چیئرمین مقرر کیا گیا ہے۔

ان کے علاوہ بطور رکن کمیٹی میں جنہیں شامل کیا گیا ہے۔ ان کے نام محبوب عالم رکن اسمبلی ، سید رکن الدین ، خالد انور رکن قانون ساز کونسل ، ڈائریکٹر محکمہ تعلیم حکومت بہار ، ڈائریکٹر عربی اور فارسی اسٹڈی اینڈ ریسرچ انسٹیٹیوٹ پٹنہ ، پرنسپل مدرسہ اسلامیہ شمس الہدی پٹنہ ،چیئرمین اسٹیٹ سنی وقف بورڈ پٹنہ ،چیئرمین بہار اسٹیٹ شیعہ وقف بورڈ پٹنہ ، ہمایوں اختر بہار شریف، عبدالکریم انصاری عرف پھول حسن انصاری مدھوبنی ، ریاض الانصاری مشرقی چمپارن اور شبیر احمد مظفر پور ہیں ۔

اس کمیٹی کی مدت کار تین سال کی ہوگی، ساتھ ہی حکومت نے اقلیتی کمیشن کی بھی تشکیل نو کر دی ہے۔ محکمہ اقلیتی فلاح کی جانب سے جاری نوٹیفکیشن کے مطابق سابق رکن اسمبلی ریاض الحق راجو کو کمیشن کا چیئرمین مقرر کیا گیا ہے ، نوشاد عالم وائس چیئرمین بنائے گئے ہیں۔نو تشکیل کمیٹی میں مظفر حسین راہی جہان آباد، مہتاب عالم عرف کابل احمد رہتاس ، افتخار احمد عرف مننا تیاگی مغربی چمپارن، ڈاکٹر اقبال سمیع مظفر پور ،محترمہ افروزه خاتون نواده ،مرتضی علی قیصر سیوان اور مکیش جین بیگو سرائے کو رکن نامزد کیا گیا ہے۔ نو تشکیل کمیٹی کی مدت کار تین سالوں کی ہوگی۔

واضح ہو کے سلیم پرویز کا تعلق جے ڈیو سے ہے اور وہ جے ڈی یو اقلیتی سیل کے ریاستی صدر بھی ہیں۔ اس سے پہلے سلیم پرویز قانون ساز کونسل کے رکن اور قانون ساس کونسل کے ڈپٹی چیئرمین کے عہدے پر بھی فائز رہ چکے ہیں وزیر اعلی نتیش کمار کے قریبی ہیں جے ڈی یو سے پہلے وہ آر جے ڈی میں بھی رہ چکے ہیں جبکہ ریاض الحق راجو کا تعلق آر جے ڈی سے ہے اور اُنہیں آر جے ڈی کے سنئیر مسلم لیڈران میں ایک تسلیم کیا جاتا ہے 2005 میں پہلی بار پانچ ماہ کے لئے رکن اسمبلی بنے تھے۔

اس طرح بہار میں دو بورڈ میں ایک آرجے ڈی تو دوسرے میں جے ڈی یو نے اپنی پارٹی کے رہنماؤں کو منتخب کیا ہے۔ حالانکہ ابھی کئی کمیٹی خالی ہے جس میں اُردو اکادمی بہار اور اُردو ایڈ وائزری کمیٹی بھی شامل ہے جو برسوں سے خالی پڑے ہیں اب انہیں پر کرنے کی مانگ ہو رہی ہے۔