Motihari Hooch Tragedy موتیہاری میں زہریلی شراب پینے سے اب تک 22 افراد ہلاک، دو افسران، نو چوکیدار معطل

بہار کے موتیہاری میں زہریلی شراب پینے سے انتظامیہ نے 22 افراد کی اموات کی تصدیق کی ہے۔ وہیں 15 افراد اب بھی بیمار ہیں جن کا علاج کیا جارہا ہے۔ اس معاملے میں ایس پی کانتیش کمار مشرا نے کارروائی کرتے ہوئے دو افسران اور 9 چوکیداروں کو معطل کردیا ہے۔

موتیہاری: ریاست بہار کے موتیہاری میں زہریلی شراب کے معاملے میں پولیس نے زہریلی شراب سے موت کی تصدیق کردی ہے۔ پریس نوٹ جاری کرتے ہوئے ایس پی کانتیش کمار مشرا نے بتایا کہ اب تک 22 لوگوں کی موت ہو چکی ہے، جن میں سے 6 لوگوں کی لاشوں کا پوسٹ مارٹم ہو چکا ہے، کل 15 لوگوں کا صدر ہسپتال میں علاج چل رہا ہے۔ اس اسکینڈل میں شراب کے 70 تاجروں کو گرفتار کیا گیا ہے۔ اس کے ساتھ ہی 2 افسران اور 9 چوکیداروں کو معطل کر دیا گیا ہے۔

پوسٹ مارٹم کیے بغیر کئی مہلوکین کی آخری رسومات ادا کی گئیں:

انتظامیہ نے اس سے قبل اس واقعے میں صرف 6 افراد کی موت کی تصدیق کی تھی، لیکن گزشتہ جمعہ سے زہریلی شراب پینے سے ہلاکتوں کا سلسلہ شروع ہوا جس کی تعداد 22 تک پہنچ گئی جب کہ انتظامیہ کے خوف کے باعث لوگوں نے کئی مہلوکین کی آخری رسومات بھی ادا کردیں۔ تاہم پٹنہ سے تین رکنی تحقیقاتی ٹیم اس واقعہ کی تحقیقات کے لیے موتیہاری گئی ہے۔ اس ٹیم میں سی آئی ڈی، پروڈکٹ اینڈ پروہیبیشن اور فرانزک سائنس لیبارٹری کے تین افراد شامل ہیں۔ اس معاملے کی تحقیقات کے بعد یہ ٹیم اپنی رپورٹ حکومت کو پیش کرے گی جس کے بعد قصوروار پائے جانے والوں کے خلاف سخت کارروائی کی جائے گی۔

پولیس نے 22 افراد کی ہلاکت کی تصدیق کی:

مقامی لوگوں کا کہنا ہے کہ ہلاک ہونے والوں کی تعداد میں مزید اضافہ ہوسکتا ہے۔ متعدد افراد مختلف مقامات پر زیر علاج ہیں جن کی حالت تشویشناک ہے۔ لوگوں کی موت کا سلسلہ گزشتہ جمعرات کی رات ہرسدھی تھانہ علاقے سے شروع ہوا، جو ہفتہ کی صبح تک جاری رہا اسی طرح ہلاک ہونے والوں کی تعداد 22 تک پہنچ گئی۔ سب سے پہلے ہرسدھی کے مٹھ لوہیار میں چار گھنٹے کے وقفے سے باپ بیٹے کی موت ہوئی تھی۔ پولیس نے اب تمام 22 افراد کی موت کی تصدیق کی ہے۔

زہریلی شراب پینے سے ہلاک ہونے والے افراد:

ہلاک ہونے والوں میں دھرپ پاسوان (48)، اشوک پاسوان(44)، رامیشور رام (35) مہیندر رام، چھوٹو کمار(19)، ویندیشوری پاسوان، جوکھو سنگھ (50)، ابھیشیک یادو (22)، گوکھولا جسینپور، دھرو یادو (23)، مینیجر سہنی (32)، گنیش پاسوان، لکشمن مانجھی(33)، نریش پاسوان(24)، سیتا یادو، سونا لال پٹیل (48)، پرمیندر داس، نول داس، بھوٹن مانجھی، بٹو رام ، ٹن ٹین سنگھ وغیرہ شامل ہیں۔