ایس ڈی او روزی کماری ، ڈی ڈی سی انعام الحق انصاری و ضلع ایجوکیشن آفیسر اشوک کمار مشرا نے مشترکہ طور پر نویں اور دسویں جماعت کے طلبا کے لئے اسمارٹ کلاسز کا افتتاح کیا۔
ارریہ ہائی اسکول میں اسمارٹ کلاسز کی شروعات اسمارٹ کلاسز کا یہ منصوبہ ضلع ارریہ کے 38 مختلف میڈل و ہائی اسکولز میں نافذ ہوگا اور اسی کے ذریعہ طلباء کی پڑھائی ہوگی۔
اس موقع پر ماسٹر ٹرینر نے ڈیمو دکھا کر موجود طلبا کو بتایا کہ کس طریقے سے پڑھائی ہوگی، ٹرینر نے یہ بھی بتایا کہ اسمارٹ کلاسز میں ایپ کے ذریعہ بھی منتخبہ مضامین کو پڑھا جاسکتا ہے۔
اس موقع پر ڈی ڈی سی انعام الحق انصاری نے موجود طلبا کو مخاطب کرتے ہوئے کہا کہ آپ اسمارٹ کلاسز سے خوب استفادہ کریں، حکومت نے تعلیمی مواد کو اس قدر آسان بنا کر آپ کے سامنے پیش کیا ہے اسی لئے آپ کو بھی چاہیے کہ اس سے زیادہ سے زیادہ فائدہ اٹھائیں۔
ایس ڈی او روزی کماری نے کہا کہ یہ اسمارٹ کلاسز آپ طلباء کے لئے وقت کے تقاضوں کے عین مطابق ہے، ہمارا بھارت جدید ترقی یافتہ ٹیکنالوجی سے آراستہ ہو رہا ہے، ہماری پوری کوشش ہے کہ مشکل ترین چیزوں کو آسان بنایا جائے اور اس سے بھر پورفائدہ اٹھایا جائے۔
اس موقع پر ضلع ایجوکیشن آفیسر اشوک کمار مشرا نے بھی طلباء کو اسمارٹ کلاسز کی اہمیت و افادیت سے آگاہ کیا۔
افتتاحی پروگرام میں موجود لوگوں میں ڈی پی او بالیشور پرساد یادو، ڈی پی او چندر پرکاش، پروگرام معاون آفیسر شیکھر آنند، راجیو رنجن، ہائی اسکول کے پرنسپل اطہر حسین کے علاوہ درجنوں اساتذہ و طلباء موجود تھے۔
