دربھنگہ: سی اے اے کے خلاف 90 برس کی دادی کا احتجاج

بہار کے دربھنگہ ضلع کے جمال چوک بازار سمیتی میں شاہین باغ دہلی کی طرز پر گزشتہ 19 دنوں سے جاری بے مدت مظاہرے میں خواتین پورے جذبہ کے ساتھ ڈٹی ہوئی ہیں۔

دبنگ دادی کے نام سے میڈیا میں مشہور 90 برس کی بزرگ خاتون اسماء خاتون نے ہزاروں کی تعداد میں موجود خواتین اور مرد حضرات سے خطاب کیا۔

اس موقع پر انہوں نے کہا کہ 'آپ لوگ ہمت سے کام لیجیے، میں 90 سال کی ہوکر بھی آپ لوگوں کے ساتھ اس لڑائی میں شامل ہوں۔ اگر وہ کہتے ہیں کہ میں ایک انچ پیچھے نہیں ہٹوں گا تو ہم کہتے ہیں کہ ہم لوگ بھی آدھا انچ پیچھے نہیں ہٹیں گے جب تک کہ وہ اس قانون کو واپس نہیں لے لیتے ہیں۔'

انہوں نے یہ بھی کہا کہ 'یہ آئین کی لڑائی ہے، ہندو مسلم دونوں طبقہ کی لڑائی ہے۔'

وہیں ای ٹی وی بھارت سے گفتگو کرتے ہوئے کہا کہ 'دربھنگہ کا ماحول بھی اچھا ہے لیکن مودی سب کو تکلیف دے رہے ہیں تو میں کہنا چاہوں گی کہ تکلیف کے بعد ہی ضرور خوشی ملے گی، چاہے ہم لوگوں کو چھ ماہ یا سال بھر ہی کیوں نہ دھرنا دینا پڑے۔'