سیاسی رہنماؤں کی رہائش گاہوں پر چھاپے ماری

ریاست بہار کے ضلع مونگیر میں اے کے 47 برآمد ہونے کے بعد بڑے پیمانے پر کارروائی جاری ہے۔ این آئی اے اور سی آر پی ایف کے ذریعے بکسر اور پٹنہ میں الگ الگ پارٹیوں کے رہنماؤں کی رہائش گاہوں پر چھاپے ماری کی جا رہی ہے۔

سابق رکن اسمبلی اور جے ڈی یو کے رہنما سنیل پانڈے کے بھائی اور سابق ایم ایل سی ہلاس پانڈے کے مختلف مقامات پر واقع مکانوں پر چھاپے ماری جاری ہے۔

تفصیلات کے مطابق آج علی الصباح این آئی اے کی ٹیم سنتوش پانڈے کے پٹنہ کے شاستری نگر تھانہ علاقے کے پٹیل نگر میں واقع پانڈے کی رہائش گاہ اور آرہ میں واقع رہائش گاہ پر ایک ساتھ چھاپے ماری کی گئی۔ ساتھ ہی سنیل پانڈے کے رشتے دار لڈو پانڈے کے مکان پر بھی چھاپے ماری کی خبر ہے۔

واضح رہے کہ جبلپور سی او ڈی سے نکالے گئے 70 سے 80 اے کے 47 میں سے اب تک مونگیر پولیس نے 22 اے کے 47 اور کثیر تعداد میں ہتھیار بنانے کا سامان اور سینکڑوں کارتوس برآمد کیا ہے۔

مونگیر پولیس کے ذریعے گذشتہ آٹھ مہینے میں اے کے 47 معاملے میں ضلع کے مختلف تھانوں میں 8 معاملے درج کرائے جا چکے ہیں۔ جن میں سے ایک معاملے کی جانچ این آئی اے کر رہی ہے۔

اس معاملے میں اب تک پولیس تین درجن لوگوں کو گرفتار کر کے جیل بھیج چکی ہے اور دو درجن لوگ اب بھی اس معاملے میں فرار ہیں۔

مونگیر پولیس نے اب تک 7 کیسز میں سے 6 کیسز میں فرد جرم دائر کر دیا ہے اور حتمی کیس پر فرد جرم دائر کرنے میں مصروف ہے۔