ریاست بہار کے ضلع کیمور پولیس نے بروقت کاروائی کرتے ہوئے نابالغ لڑکی کی شادی ہونے سے بچایا۔
پولیس نے موقع سے تین دلالوں کو بھی گرفتار کیاہے اس کے پاس سے ایک کار بھی ضبط کی گئی ہے جسے شادی کے بعد دلہن کو وداع کے لیے لے جانے کی تیاری کی جارہی تھی۔ پولیس کو دیکھ کر دولہا موقع سے فرار ہونے میں کامیاب ہوگیا۔
چین پور پولیس نے اس معاملہ میں نابالغ لڑکی کے والدین سے بھی پوچھ گچھ کے لیے حراست میں لیا ہے۔ وہیں والدین نے تین لاکھ روپے لینے کی بات بھی قبول کی ہے۔
اطلاع کے مطابق جمعہ کے روز چین پور پولیس کو خفیہ ذرائع سے اطلاع ملی کے کچھ دلال ایک نابالغ لڑکی کی شادی کرانے کے لیے جمع ہوئے ہیں۔
چین پور تھانہ پولیس نے موقع پر پہنچ کر بروقت کاروائی کی ۔
کیمور ایس پی دلنواز احمد نے بتایا کی اتر پردیش کے ضلع آگرہ کا رہائشی چھوٹو، کیمور کا رہائشی کھرپتو رام اور منا رام کو گرفتار کیا گیاہے۔ ایس پی نے کہا کہ موقع سے چوتھا شخص جو دولہا بن کر شادی کے لیے آیا تھا، جس کا نام پپو نٹ ہے وہ فرار ہونے میں کامیاب رہا۔
