بہار: آسمانی بجلی گرنے سے لوگوں کی موت پر مودی کا اظہار افسوس

وزیراعظم نریندر مودی نے بہار اور اترپردیش کے کچھ اضلاع میں بارش اور آسمانی بجلی گرنے سے لوگوں کی موت پر رنج و غم ظاہر کرتے ہوئے ان کے اہل خانہ سے تعزیت کا اظہار کیا۔

وزیر اعظم نے ٹوئٹ کرتے ہوئے کہا کہ بہار اور اترپردیش کے کچھ اضلاع میں بھاری بارش اور آسمانی بجلی گرنے سے کئی افراد کی موت کی خبر سن کر کافی دکھ ہوا۔ ریاستی حکومت مستعدی کے ساتھ راحت اور بچاؤ کے کام میں مصروف ہے۔ اس تباہی میں جن لوگوں نے اپنی جان گنوائی ہے میں ان کے اہل خانہ کے تئیں اپنی تعزیت کا اظہار کرتا ہوں۔

خیال رہے کہ بہار میں مختلف مقامات پر بھاری بارش اور آسمانی بجلی گرنے سے 83 افراد کی موت جبکہ اترپردیش میں کئی جگہوں پر اسی طرح کے واقعات میں دس لوگوں کی موت ہوگئی ہے۔