Pilgrims First installment Receipt عازمین پہلی قسط جمع کروانے کی رسید بذریعہ ڈاک بھیج سکتے ہیں

ریاست بہار کی حج کمیٹی نے عازمین حج کے لیے ایک سہولت فراہم کی ہے۔ اب جمع کی گئی رقم کی رسید اور میڈیکل سرٹیفکیٹ ڈاک کے ذریعے بھیجا جا سکتا ہے۔ پہلے یہ سہولت نہیں تھی۔ البتہ کسی مجبوری کے تحت ڈاک کے ذریعے رسید پہلے قبول ہوتی تھی۔

گیا: ریاست بہار میں حج آپریشن 2023 کی تیاریاں جاری ہیں، گیا ضلع ہوائی اڈہ امبارکیشن پوائنٹ سے پرواز کو قریب ایک ماہ بچا ہوا ہے، اس دوران اس برس سفر حج پر جانے کا ارادہ رکھنے والے افراد کو پہلی قسط کی رقم جمع کرنے کی آخری تاریخ 15 اپریل متعین ہے، بہار حج بھون نے باضابطہ اس کے لیے سرکولر جاری کرکے اس کی پوری جانکاری عازمین کو فراہم کی ہے، لیکن اس دوران اس برس سفر حج پر روانہ ہونے والوں کے لیے حج بھون نے کچھ راحت دی ہے اور انہیں پیسہ جمع کرنے کی رسید حج بھون تک پہنچانے کے لیے آسانی فراہم کی ہے۔

بہار حج کمیٹی کے چیئرمین عبدالحق نے کہا ہے کہ جو عازمین پہلی قسط کا پیسہ جمع کرچکے ہیں یا پھر سنیچر تک جمع کریں گے انہیں پیسہ جمع کرنے کی رسید حج بھون تک پہنچانے کے لیے زیادہ پریشان ہونے کی ضرورت نہیں ہے۔ جو پٹنہ حج بھون نہیں آنا چاہتے ہیں وہ جمع رقم کی رسید کسی معرفت سے بھیج سکتے ہیں، ڈاک، اسپیڈ پوسٹ کے ذریعے ریاستی حج کمیٹی کے دفتر حج بھون بھیج سکتے ہیں، اسی طرح رسید کے ساتھ وہ میڈیکل سرٹیفکیٹ کی کاپی ڈاک کے ذریعے بھیج سکتے ہیں۔

مزید یہ بھی واضح کیا گیا ہے کہ میڈیکل فٹنس کی کاپی کے ساتھ دیگر کوئی بھی رپورٹ کاپی منسلک نہیں کرنا ہے۔ حالانکہ انہوں نے یہ بھی کہا کہ جن لوگوں نے پہلی قسط جمع کردی ہے۔ وہ رسید بھیجنے میں تاخیر نہ کریں بلکہ فوری طور پر بھیج دیں، کیوں کہ یہاں سے آگے کارروائی فوری طور پر شروع ہوجائے گی۔ ساتھ ہی انہوں نے یہ بھی کہا کہ مقررہ آخری تاریخ تک پہلی قسط کی رقم جمع نہیں کرنے کی صورت میں خواہشمند عازمین حج کا رجسٹریشن منسوخ ہو سکتا ہے۔ اس لیے 15 اپریل بروز سنیچر کو ہر حال میں رقم جمع کرادیں۔ واضح ہو کہ حج رقم کی پہلی قسط فی کس 81800 روپیے حج کمیٹی آف انڈیا کی ویب سائٹ http://hajcommittee.gov.in پر آن لائن یا پے ان سلیپ کے ذریعے اسٹیٹ بینک آف انڈیا یا یونین بینک آف انڈیا کے کور بینکنگ کی سہولت والی کسی بھی شاخ میں جمع کرسکتے ہیں۔