کورونا کی وجہ سے جوڈیشیل مجسٹریٹ کے امتحان کی تاریخوں میں توسیع سے ہائی کورٹ کا انکار

پٹنہ ہائی کورٹ نے چھ دسمبر کو ہونے والے جوڈیشیل مجسٹریٹ کے پرائمری امتحان ( پی ٹی ) کی تاریخ کو کورونا کے خطرات کے مد نظر بڑھانے سے انکار کر دیا ہے۔

جسٹس شیواجی پانڈے اور جسٹس پارتھ سارتھی کی بینچ نے کائتی سنہا اور دیگر کی جانب سے جوڈیشیل مجسٹریٹ کے پرائمری امتحانات کو ٹالنے کیلئے دائر مفاد عامہ کی عرضی پر منگل کو سماعت کے بعد خارج کر دیا۔

جھارکھنڈ کے بوکارو کی درخواست گذار نے کورونا انفیکشن کے خطرات کے مد نظر جوڈیشیل مجسٹریٹ کے پی ٹی امتحان کی تاریخ چھ دسمبر سے آگے بڑھانے کی گہار لگائی تھی۔

بہار پبلک سروس کمیشن ( بی پی ایس سی ) کی جانب سے وکیل سنجے پانڈے نے مفاد عامہ کی مخالفت کرتے ہوئے کہا کہ جب لوگ دیوالی اور چھٹھ میں سبھی تحفظاتی تدابیر کے ساتھ کھلے میں آجا سکتے ہیں اور بہار اسمبلی انتخاب میں حصہ لے سکتے ہیں تو امتحان دینے سے کترانا نامناسب ہے۔

بی پی ایس سی مکمل سیکوریٹی انتظامات کے تحت امتحان لے رہا۔ داروغہ بھرتی اور بی پی ایس سی مین امتحان میں بھی امیدوار شامل ہورہے ہیں اس لئے پی ٹی امتحان کی تاریخمیں توسیع کا کوئی جواز نہیں ہے۔

ہائی کورٹ نے بھی کہا کہ کورونا وبا میں جب ملک بھر میں میڈیکل انٹرنس ٹسٹ ( نیٹ) کے امتحانات ہوئے ہیں تو پھر بہار میں ہونے والا پی ٹی امتحان بھی محفوظ طور پر ہوسکتا ہے۔ عدالت نے اسی بنیاد پر عرضی خارج کر دی۔