اویسی طالبانی سوچ رکھتے ہیں: بی جے پی رکن اسمبلی

بہار کے مدھوبنی ضلع کے بسفی سے بی جے پی رکن اسمبلی ہری بھوشن ٹھاکر بچول نے کہا کہ ملک کے اندر اویسی جیسی سوچ رکھنے والوں کے لئے کوئی جگہ نہیں، جنہیں ملک کے اندر رہنے میں دقعت ہے وہ افغانستان چلے جائے۔

بہار کی سیاست میں اپنے بیانوں سے سرخیوں میں رہنے والے مدھوبنی ضلع کے بسفی سے بی جے پی رکن اسمبلی ہری بھوشن ٹھاکر بچول نے آل انڈیا مجلس اتحاد المسلمین کے صدر اسدالدین اویسی کو طالبانی ذہنیت والا شخص قرار دیا ہے۔ صحافیوں سے بات کرتے ہوئے بچول نے کہا کہ اویسی دوسرے جناح بننا چاہتے ہیں لیکن وزیراعظم نریندر مودی کے رہتے ہوئے ایسا نہیں ہوگا۔

بچول نے کہا کہ اویسی جیسے لوگ فرقہ پسندانہ سوچ اور غزوہ الہند کی سوچ رکھنے والے ہیں۔ پاکستان اور افغانستان کی مسجدوں میں گولیاں چلتی ہیں، بھارت میں ایسا نہیں ہوتا۔

انہوں نے سوال کیا کہ افغانستان کے حالات پر 'لبرل گینگ' خاموش کیوں ہے۔ وہ افغانستان پر بات کیوں نہیں کر رہے ہیں؟

بچول نے کہا بھارت کے لوگ امن پسند ہیں، اور یہاں کسی کو حالات خراب کرنے کی اجازت نہیں دی جائے گی۔

انہوں نے کہا جو بھی لوگ شدت پسندی کی حمایت کرتے ہیں ایسے لوگوں کو یہاں رہنے کا کوئی حق نہیں ہے، وہ افغانستان چلے جائیں۔ وہاں پٹرول ڈیزل سستا ہے، مکان بھی سستا ہے۔ وہاں جاکر دیکھیں تب بھارت کے بارے میں بات کریں۔