پٹنہ: بہار میں کئی گھنٹے تک جاری رہنے والی اپوزیشن پارٹیوں کا عام اجلاس اختتام کو پہنچ گیا۔ اس میں شامل تمام لیڈروں نے آئندہ لوک سبھا انتخابات میں بی جے پی کے خلاف متحد ہونے پر سوچ بچار کی۔ اجلاس میں اپوزیشن جماعتوں نے اتفاق کیا ہے اور اب اگلی میٹنگ 12 جولائی کو شملہ میں ہوگی۔ اس میں حتمی فیصلہ ہونا ہے۔ دراصل بہار کی راجدھانی پٹنہ میں وزیر اعلیٰ نتیش کمار کی رہائش گاہ پر اپوزیشن لیڈروں کی میٹنگ ہوئی۔ تقریباً 4 گھنٹے تک جاری رہنے والی اس ملاقات میں 15 جماعتوں کے رہنما شریک تھے۔ میٹنگ میں نتیش کمار کو کنوینر بنانے پر بحث ہوئی، لیکن ابھی تک فیصلہ نہیں ہوا ہے۔ اس کے ساتھ ہی مرکز کے آرڈیننس، سیٹ شیئرنگ اور مشترکہ کم سے کم پروگرام پر بات چیت ہوئی۔ اب اگلی میٹنگ شملہ میں ہوگی۔
اس میں ممتا بنرجی، اروند کیجریوال، بھگونت مان، ایم کے اسٹالن سمیت چھ ریاستوں کے وزیراعلیٰ اور اکھلیش یادو، ادھو ٹھاکرے، محبوبہ مفتی سمیت 5 ریاستوں کے سابق وزیراعلیٰ نے حصہ لیا۔ اس میٹنگ میں راہل گاندھی اور کانگریس صدر ملکارجن کھرگے بھی موجود تھے۔ میٹنگ میں 2024 کے لوک سبھا انتخابات اور پی ایم نریندر مودی اور بی جے پی کو اقتدار سے ہٹانے سے متعلق حکمت عملی پر تبادلہ خیال کیا گیا۔ ملاقات کے بعد تمام رہنماؤں نے مشترکہ پریس کانفرنس بھی کی۔ اس میں سبھی لیڈروں نے کہا کہ آنے والے لوک سبھا انتخابات میں اتحاد کو لے کر معاہدہ ہوا ہے۔
مشترکہ پریس کانفرنس میں کس رہنما نے کیا کہا، جانئے
بہار کے وزیر اعلیٰ نتیش کمار
بہار کے وزیر اعلیٰ نتیش کمار نے پریس کانفرنس سے خطاب کرتے ہوئے کہا کہ سب نے مل کر الیکشن لڑنے کا فیصلہ کیا ہے۔ انہوں نے کہا کہ اگلے ماہ ہونے والے اجلاس میں اسے حتمی شکل دی جائے گی۔ دوسری میٹنگ میں سیٹوں کی تقسیم پر بات کی جائے گی۔ آئندہ اجلاس میں فیصلہ کیا جائے گا کہ کون کہاں سے لڑے گا۔ جو لوگ حکمرانی میں ہیں وہ ملک کے مفاد میں کام نہیں کر رہے۔ یہ سب تاریخ بدل رہے ہیں۔
کانگریس صدر ملکارجن کھرگے
اس موقع پر کانگریس صدر ملکارجن کھرگے نے کہا کہ ہم 12 جولائی کو شملہ میں دوبارہ میٹنگ کر رہے ہیں، جس میں ہم ایک مشترکہ ایجنڈا تیار کریں گے۔ ہمیں ہر ریاست میں مختلف طریقے سے کام کرنا ہوگا۔
کانگریس رہنما راہل گاندھی
دوسری جانب راہل گاندھی نے کہا کہ بی جے پی اور آر ایس ایس بھارت کی بنیاد پر حملہ کر رہے ہیں۔ یہ نظریات کی لڑائی ہے اور ہم ساتھ کھڑے ہیں۔ ہم نے فیصلہ کیا ہے کہ ہم مل کر کام کریں گے اور اپنے مشترکہ نظریے کا دفاع کریں گے۔ یہ اپوزیشن اتحاد کا عمل ہے جو آگے بڑھے گا۔
بنگال کی وزیر اعلیٰ اور ترنمول کانگریس کی سپریمو ممتا بنرجی
وہیں مغربی بنگال کی وزیر اعلیٰ اور ترنمول کانگریس کی سپریمو ممتا بنرجی نے کہا کہ میٹنگ میں اچھی بات چیت ہوئی۔ میں نے نتیش جی کو پٹنہ میں ہونے والی میٹنگ کے بارے میں کہا تھا کہ عوامی تحریک کا آغاز یہیں سے ہوتا ہے۔ تین مسائل پر بات ہوئی۔ ہم متحد ہیں۔ ہم مل کر لڑیں گے۔ اگلی میٹنگ شملہ میں ہوگی۔
جموں و کشمیر کی سابق وزیر اعلیٰ اور پی ڈی پی کی سربراہ محبوبہ مفتی
اس دوران جموں و کشمیر کی سابق وزیر اعلیٰ اور پی ڈی پی کی سربراہ محبوبہ مفتی نے کہا کہ ملک کے اندر کیا ہو رہا ہے۔ جموں و کشمیر اس کی ایک مثال ہے۔ آج جب ہم دیکھ رہے ہیں کہ ملک کے اندر لوگوں کے ساتھ کیسا سلوک ہو رہا ہے، اسی لیے آج ہم سب یہاں جمع ہوئے ہیں۔ ہماری کوشش رہے گی کہ گاندھی کے ملک کو گوڈسے کا ملک نہیں بننے دیا جائے۔
مہاراشٹر کے سابق وزیر اعلیٰ ادھو ٹھاکرے
میٹنگ کے بعد مہاراشٹر کے سابق وزیر اعلیٰ ادھو ٹھاکرے نے کہا کہ تمام اہم رہنما یہاں موجود ہیں۔ یہ فطری بات ہے کہ ہمارے نظریات مختلف ہیں لیکن ملک ایک ہے۔ اسی لیے آج ہم یہاں اکٹھے ہیں۔ جو ملک کی جمہوریت پر حملہ کرے گا ہم مل کر اس کا مقابلہ کریں گے۔ ملک میں آمریت لانے والوں کی ہم مخالفت کریں گے۔
جموں و کشمیر کے سابق وزیر اعلیٰ اور نیشنل کانفرنس لیڈر عمر عبداللہ
جموں و کشمیر کے سابق وزیر اعلیٰ اور نیشنل کانفرنس لیڈر عمر عبداللہ نے کہا کہ ہمارا مقصد اقتدار حاصل کرنا نہیں ہے۔ یہ اقتدار کی لڑائی نہیں، ملک بچانے کی لڑائی ہے۔ ہم اس ملک کو بربادی سے بچانے، جمہوریت کو حقیقی معنوں میں زندہ کرنے کے لیے ملے ہیں۔ بہت اچھا لگا، کل وزیر اعظم امریکہ میں جمہوریت کی بات کر رہے تھے۔ لیکن کشمیر میں یہ جمہوریت کیوں نہیں؟ ایسی ملاقات ہونی چاہیے۔ چار ریاستوں میں انتخابات ہونے ہیں۔ یہ الیکشن کی تیاری کا پہلا قدم ہے۔
سی پی آئی (ایم) کے جنرل سکریٹری سیتارام یچوری
سی پی آئی (ایم) کے جنرل سکریٹری سیتارام یچوری نے کہا کہ ہم سب کو مل کر ملک کی حفاظت کرنی ہے۔ آئین کے ستونوں پر حملے ہو رہے ہیں۔ اسے بچانا ہے۔ اس لیے ہم سب جمع ہوئے ہیں۔ مہنگائی، بے روزگاری ہر چیز پر بات ہوگی۔ ریاستوں میں انتخابی تال میل پر بھی بات ہوگی، تاکہ بی جے پی کو فائدہ نہ ملے۔ سی پی آئی-ایم ایل کے جنرل سکریٹری دیپانکر بھٹاچاریہ نے کہا کہ ایک اچھی شروعات ہوئی ہے۔ ہم نے فیصلہ کیا ہے کہ آج ہم جس موڑ پر ہیں، بی جے پی کو سوائے اقتدار کے کچھ سمجھ نہیں آرہا ہے۔ منی پور جل رہا ہے، لیکن انہیں کوئی پرواہ نہیں۔ بہار سب سے زیادہ تحریکوں کی ریاست ہے، اس لیے ہم بہار سے ملک کو بچانے کی پوری کوشش کریں گے۔
جھارکھنڈ کے وزیر اعلیٰ ہیمنت سورین
جھارکھنڈ مکتی مورچہ کے رہنما اور جھارکھنڈ کے وزیر اعلیٰ ہیمنت سورین نے کہا کہ ملک کی موجودہ صورتحال پر تبادلہ خیال کیا گیا۔ آج اس جمہوریت میں کچھ چیزوں پر بہت تیزی سے حملہ کیا جا رہا ہے۔ آج آپ جانتے ہیں کہ عام لوگوں، کسانوں، مزدوروں، پڑھے لکھے اور بے روزگاروں کی کیا سوچ ہے۔ دنیا میں اس ملک کا ایک امیج رہا ہے، تنوع میں اتحاد ہے، جسے دنیا نے مانا ہے۔ اس میں دراڑ آ گیا ہے۔ اسے ٹھیک کرنا ہے۔ مختلف نظریات کے لوگ یہاں موجود ہیں، آج بہت سے مسائل پر بات ہوئی۔
سماج وادی پارٹی کے سربراہ اکھلیش یادو
سماج وادی پارٹی کے سربراہ اور اتر پردیش کے سابق وزیر اعلی اکھلیش یادو نے کہا کہ آج یہاں نہ صرف پارٹیاں بلکہ ملک کے لیڈران ملاقات کر رہے ہیں۔ ہم تمام جماعتیں مل کر کام کریں گے، ہم اس بات پر کام کریں گے کہ ملک کیسے آگے بڑھےگا۔
آر جے ڈی سپریمو لالو یادو
آر جے ڈی سپریمو لالو یادو نے کہا کہ ہم مکمل طور پر فٹ ہو چکے ہیں اور نریندر مودی کو مکمل طور پر فٹ کر دیں گے۔ یہاں طے پایا کہ اگلی میٹنگ شملہ میں ہوگی۔ مزید حکمت عملی شملہ میں طے کی جائے گی۔ ہمیں متحد ہو کر لڑنا ہے۔ لوگ کہتے تھے کہ آپ لوگ متحد نہیں ہیں، اسی لیے بی جے پی والے جیت جاتے ہیں۔ نریندر مودی امریکہ میں چندن کی لکڑی بانٹ رہے ہیں۔
اپوزیشن جماعتوں کے اجلاس میں 15 جماعتوں کے 27 رہنماؤں نے شرکت کی
اپوزیشن جماعتوں کے اجلاس میں 15 جماعتوں کے 27 رہنماؤں نے شرکت کی۔ نتیش کمار، راہول گاندھی، ممتا بنرجی، ایم کے اسٹالن، ملیکارجن کھرگے، بھگونت مان، اروند کیجریوال، ہیمنت سورین، ادھو ٹھاکرے، شرد پوار، لالو پرساد، اکھلیش سنگھ یادو، عمر عبداللہ، محبوبہ مفتی، ٹی آر بالو، دیپانکر بھٹاچاریا یادو، ابھیشیک بنرجی، ڈیرک اوبرائن، کے سی وینوگوپال، سپریا سولے، منوج جھا، فرہاد حکیم، پرفل پٹیل، راگھو چڈھا، سنجے سنگھ، سنجے راوت، راجیو رنجن سنگھ عرف لالن سنگھ، سنجے جھا، سیتارام یچوری، آدتیہ ٹھاکرے ڈی راجہ نے شرکت کی۔
یہ بھی پڑھیں: Patna Opposition Meeting پٹنہ میں منعقدہ اپوزیشن اتحاد کی میٹنگ پر مسلم سیاسی مبصرین کا ردعمل
