تاریخی گلزار باغ امام بارگاہ میں نویں محرم کی مجلس سادگی کے ساتھ اختتام پذیر

نویں محرم کی الوداعیہ مجلس بھی آن لائن منعقد ہوئی۔ شہر میں نا کوئی جلوس نکلا نا ہی اجتماعی طور پر مجالس کا اہتمام کیا گیا۔ تمام عزاداروں نے اپنے گھروں میں مجالس کا اہتمام کیا۔

امام باندی بیگم امام بارگاہ کے مولانا اسعد رضا نے ای ٹی وی سے خصوصی ملاقات میں کہا کہ اس بار کورونا وائرس کی وجہ سے پورے اہتمام کے ساتھ محرم نہیں منایا گیا۔ حکومت کی پابندی کا لحاظ رکھتے ہوئے ہر جگہ عزاداروں نے اپنے امام بارگاہوں میں مجالس قائم کی لیکن اس بات کا لحاظ رکھا کہ حکومت کی پابندیوں پر عمل درآمد بھی ہو اور ہم اپنے اس فرائض کو انجام بھی دیں۔

انہوں نے کہا کہ شہر عظیم آباد کا یہ تاریخی امام بارگاہ جسے گلزار باغ کے نام سے جانا جاتا ہے۔ امام باندی بیگم نے 1890 میں اپنی ساری جائیداد وقف کر دی تھی اور اس وقف کے ساتھ ساتھ انہوں نے مجالس عزا کو بھی فروغ دیا دینی امور کو بھی انجام دیا۔

انہوں نے بتایا کہ حکومتی سطح پر جلوس اور علم کے نکالنے پر پابندی ہے۔ صرف تعزیہ کو دفن کرنے کے لیے پانچ پانچ افراد کو اجازت ہے.

مولانا نے کہا کہ یہاں خصوصی طور پر الوداعیہ مجلس کے موقع پر شہر کے 4 ہزار افراد جمع ہوتے تھے۔ بڑے اہتمام اور شان و شوکت کے ساتھ یہ مجلس ہوا کرتی تھی۔