جدید ترین سہولیات سے لیس آئسولیشن مرکز کا افتتاح

ضلع مظفر پور میں جدید ترین سہولیات سے لیس 100 بیڈ والا دوسرا آئسولیشن مرکز تیار کیا گیا ہے۔ جو صدر ہسپتال ایم سی ایچ بلڈنگ میں بنایا گیا ہے۔

ریاست بہار کے ضلع مظفر پور میں کورونا کے سبب ضلع انتظامیہ ہائی الرٹ ہے۔ وہیں ضلع میں 100 بیڈ کا جدید ترین سہولیات سے آراستہ دوسرا آئسولیشن مرکز بھی مکمل طور پر تیار ہو چکا ہے۔ ضلع صدر ہسپتال کمپلیکس میں واقع ایم سی ایچ عمارت کو موجودہ وقت میں کورونا کے لیے ایک خاص آئسولیشن کا مرکز بنایا گیا ہے۔ جہاں کورونا متاثرین کے علاج کے لیے ڈاکٹروں کی ایک ٹیم بھی تعینات کردی گئی ہے۔

وہیں اس آئسولیشن مرکز میں اس بات کا خاص خیال رکھا گیا ہے کہ مریضوں کو کسی بھی قسم کی دشواری کا سامنا نہ کرنا پڑے۔ اس بڑی عمارت میں پہلی منزل پر ڈاکٹروں کے لیے ہے۔ جبکہ دوسری اور تیسری منزل پر مریضوں کو رکھنے کے انتظامات کیے گئے ہیں۔

تمام کمروں سے باتھ روم بھی منسلک ہیں۔ جس سے کورونا کے متاثرہ مریضوں سے دوسرے میں بھی انفیکشن پھیلنے کا خطرہ بہت کم ہے۔ اس وقت اس آئسولیشن مرکز میں ڈاکٹروں اور صحت کے کارکنوں کی ایک پندرہ رکنی ٹیم تعینات کی گئی ہے۔

واضح رہے کہ یہ مظفر پور میں دوسرا بڑا آئسولیشن مرکز ہے جو کورونا کے لیے تیار ہوا ہے۔ اس سے قبل مظفر پور کے ایس کے ایم سی ایچ میڈیکل کالج کیمپس میں جدید ترین سہولیات سے آراستہ ایک 100 بیڈ پر مشتمل آئسولیشن مرکز شروع کیا جا چکا ہے۔