Mufti Moinuddin Qasmi عید کی نماز سے قبل صدقہ فطر ادا کریں: مفتی معین الدین قاسمی

مولانا مفتی معین الدین قاسمی نے کہاکہ رمضان المبارک کے آخری عشرہ میں ہم لوگ داخل ہو چکے ہیں، یہ مبارک مہینہ اب ہم سے جدا ہونے والا ہے، اس لئے اب جتنے دن بھی باقی ہیں اسے غنیمت جانیں اور بچے ہوئے ایام میں ذکر و اذکار کی کثرت کریں۔ یہ نہیں معلوم کہ ہم میں سے کتنوں کو آئندہ سال یہ مبارک مہینہ نصیب ہوگا۔ یہ عشرہ شب قدر کی تلاش کا ہے۔

پٹنہ:ریاست بہار کی کربگھیہ جامع مسجد کے امام و تنظیم آئمہ مساجد بہار کے نائب صدر مولانا مفتی معین الدین قاسمی نے ای ٹی وی بھارت سے خصوصی بات چیت کے دوران کہاکہ لوگ یکسوئی ہوکر اس عشرہ میں شب قدر کی تلاش کریں، خوش نصیب ہے وہ شخص جسے شب قدر مل گئی اور وہ ہزار مہینوں کے عبادت کا مستحق ہو گیا۔ انہوں نے کہا کہ اس مہینے میں ایک خاص عمل زکوٰۃ و صدقات کا ہے، مگر عام طور سے دیکھا جاتا ہے کہ لوگ اس میں تساہلی سے کام لیتے ہیں۔

کچھ لوگ عید کے دن صدقۃ الفطر کی رقم ادا کرتے ہیں جو غیرمناسب ہے، عید سے پہلے پہلے ادا کرنے کا مطلب عید کے دن ادا کرنا نہیں ہے بلکہ اس سے پہلے جو اس کے مستحقین ہیں ان تک پہنچانے کا حکم ہے تاکہ وہ بھی اس خوشی میں شریک ہوجائیں۔ ان کا کہنا ہے کہ مومنوں کو چاہیے کہ وہ اس میں غفلت ہرگز نہ برتیں بلکہ اگر جن لوگوں نے ابھی تک زکوٰۃ یا فطرہ کی رقم ادا نہیں کئے ہیں وہ پہلی فرصت میں اسے ادا کریں۔

مفتی معین الدین قاسمی نے مزید کہا کہ اس آخری عشرہ میں گناہوں سے نجات دی جاتی ہے۔ لوگ اپنی گناہوں سے توبہ کرتے ہوئے عزم کریں کہ آنے والے بقیہ مہینے بھی ہم اسی طرح گزاریں جیسے رمضان المبارک کا مہینہ گزارا ہے۔یہ مہینہ غمخواری اور لوگوں کی مدد کا ہے۔ اس عمل کو ہمیں غیر رمضان میں بھی جاری رکھنا چاہیے۔اللہ تعالیٰ اس مہینے سے تقویٰ چاہتا ہے ۔ جب یہ تقویٰ حاصل ہو جائے گا تو یقیناً کل قیامت کے دن ہمارا شمار اللہ کے محبوب بندوں میں ہوگا.