ضلع گیا کے پہلے اقلیتی انگریزی میڈیم اسکول کے بانی معیز الرحمان کا انتقال

Moezurrahman Passes Away: گیا ضلع کے سب سے قدیم اقلیتی انگلش میڈیم اسکول کے بانی نے آج داعیٔ اجل کو لبیک کہہ دیا۔ پچپن برس قبل سینٹ چشتی اکیڈمی کے نام سے پہلا انگریزی میڈیم اسکول شہر میں قائم ہوا تھا اور اس کے قیام کا مقصد غریب اور یتیم اقلیتی بچوں کو انگلش میڈیم کی طرز پر تعلیم سے آراستہ کرنا تھا۔

گیا:گیا شہر کے سب سے قدیم انگلش میڈیم اسکول ' سینٹ چشتی اکیڈمی ' کے بانی محمد معیز الرحمان کا انتقال پر ملال ہو گیا ہے۔ بدھ کے دن تقریباً 11:45 بجے بنگلورو میں علاج کے دوران ان کا انتقال ہوا۔ ان کی عمر 76 سال تھی اور وہ ضلع کے پہلے ایسے شخص تھے۔ جنہوں نے پہلے انگریزی میڈیم اسکول کو قائم کیا تھا۔ آج بھی یہ اسکول شہر گیا کے معروف گنج محلے میں آباد ہے، واضح ہو کہ غریب بچوں کو بہتر تعلیم فراہم کرنے کے مقصد سے انہوں نے گیا شہر میں سینٹ چشتی اکیڈمی کے نام سے ایک انگلش میڈیم اسکول قائم کیا تھا۔ شہر گیا میں یہ اسکول سنہ 1971 میں شروع کیا گیا تھا جہاں بچے کم سے کم فیس میں بہتر تعلیم حاصل کر سکتے تھے۔

غریب بچوں کی معیاری تعلیم کے خواب کو انہوں نے جذبہ میں بدل دیا تھا اور ایک بہترین اسکول پچپن برس قبل قائم کیا، بہترین تعلیم کو دیکھتے ہوئے نہ صرف غریب بچے بلکہ معاشرے کے ہر طبقے کے بچے ان کے اسکول میں پڑھتے تھے۔ سینٹ چشتی اکیڈمی سے تعلیم حاصل کرنے والے طلبہ نے اپنی زندگی میں اعلیٰ مقام حاصل کیا ہے۔ ان کے انتقال کی خبر ملتے ہی گیا شہر کے تعلیمی ادارے سوگوار ہوگئے اور تعلیمی اداروں سے جڑے لوگوں نے گہرے رنج و غم کا اظہار کیا ہے اور مرحوم کے درجات کی بلندی کے لیے دعا کی ہے۔