ریاست بہار میں ماب لنچنگ کے واقعات میں مسلسل اضافہ ہو رہا ہے، ضلع گیا کے گرارو علاقے میں بچہ چور کے الزام میں ایک نوجوان اور خاتون کی بے رحمی سے پٹائی کی گئی، جس میں دونوں شدید طور پر زخمی ہوگئے ہیں، متاثرین کا علاج گرارو پرائمری ہیلتھ سینٹر میں چل رہا ہے۔
ذرائع کے مطابق گرارو تھانہ حلقہ کے آزاد بیگہ گاوں کے قریب بچہ چوری کے الزام میں اورنگ آباد ضلع کے رفیع گنج کے رہنے والے بھولا نامی نوجوان اور ایک خاتون کی بھیڑ نے پٹائی کردی۔
زخمی بھولا کے مطابق وہ دھنباد انٹرسیٹی ایکسپریس سے جارہاتھا تبھی وہ گرارو ریلوے اسٹیشن پر ضروریات سے فارغ ہونے کے لئے اترا ، اسی دوران اسکی گاڑی چھوٹ گئی اور وہ پیدل پریا کی جانب جانے لگا تبھی کچھ لوگوں نے بچہ چور کا شور مچایا اور دیکھتے ہی دیکھتے وہاں بھیڑ جمع ہوگئی اور اسکو مارناشروع کردیا وہیں ایک خاتون جو اس راستے سے گزر رہی تھی وہ بھی ہجومی تشدد کے زد میں آگئی۔
واقعہ کی اطلاع کے بعد گرارو تھانہ کی پولیس جائے حادثہ پرپہنچی اور متاثرین کوبھیڑ سے چھوڑا کر پی ایچ سی گرارو میں داخل کرایا ، جہاں دونوں زیرعلاج ہیں۔ اس معاملے میں پولیس جانچ کرکے کاروائی کرنے کی بات کہ رہی ہے
