کسانوں کی حمایت میں بھاگلپور شہر بھی رہا بند

زرعی قوانین کے خلاف پورے ملک کی طرح ریاست بہار کے بھاگلپور ضلع میں بھی پر امن طریقے سے بند منایا گیا اور شہر خاص کی زیادہ تر دکانیں اور تجارتی ادارے بند رہے۔ حزب اختلاف کی سیاسی پارٹی کے لیڈروں اور کارکنوں نے شہر میں جگہ جگہ ریلی نکالی اور کسانوں کی حمایت میں نعرے لگائے۔ ان لوگوں نے مرکزی حکومت سے زرعی قانون کو فوراً واپس لینے کا مطالبہ کیا۔

اس بند میں کانگریس اور آرجے ڈی کے لیڈران بھی پیش پیش رہے۔ بھاگلپور کے ناتھ نگر اسمبلی حلقہ سے آر جے ڈی کے رکن اسمبلی علی اشرف صدیقی نے اسٹیشن کے گولمبر چوراہے پر دھرنا دیا اور زرعی قانون کو فوراً واپس لینے تک احتجاج جاری رکھنے کا عہد کیا۔

انہوں نے کہا کہ ملک کی موجودہ حکومت کسانوں کو بھی کارپوریٹ کا غلام بنانے کی سازش رچ رہی ہے، لہذا ان کی پارٹی ہر مرحلے پر کسانوں کے ساتھ کندھا سے کندھا ملا کر اس حکومت کے خلاف آواز بلند کرے گی۔

کسانوں کی حمایت میں اس بند میں شہر کے سماجی کارکنوں اور عام لوگوں نے بھی کثیر تعداد میں شرکت کی۔ ان لوگوں کا کہنا تھا کہ مرکزی حکومت کارپوریٹ کے ہاتھوں کا کھلونا بن گئی ہے اور سارے قانون کارپوریٹ کو فائدہ پہنچانے اور عام لوگوں کو معاشی طور پر غلام بنانے کیلئے بنائے جا رہے ہیں، لہذا عوام کو اب بیدار ہوجانا چاہئے۔