شہر گیا کے رام پور انسپکٹر آفس کے سامنے اے ٹی ایم کاٹ کر مجرموں نے 13 لاکھ روپے لوٹ لیے۔ اطلاع کے مطابق تین کی تعداد میں بدمعاش تھے۔
رام پور تھانہ علاقہ کے پولیس انسپکٹر آفس کے سامنے ایچ ڈی ایف سی بینک کا اے ٹی ایم ہے جس کو کاٹ کر 13 لاکھ روپے چوری ہوئی ہے۔ واقعہ کی تصدیق ایس ایس پی راجیو مشرا نے کی ہے۔
ایس ایس پی سمیت پولیس کے اعلی افسران نے پہنچ کر موقع واردات کا جائزہ لیا۔ اعلی افسران نے اے ٹی ایم کی ویڈیو فوٹیج طلب کی ہے۔ پولیس اس کی بنیاد پر تفتیش آگے کررہی ہے۔ ایس ایس پی راجیو مشرا نے فون پر بتایا کہ یہ واقعہ پولیس انسپکٹر آفس رام پور کے سامنے پیش آیاہے۔ قریب تیرہ لاکھ روپئے کی لوٹ ہوئی ہے۔ واقعہ علی الصباح پیش آیا ہے۔
اے ٹی ایم کے صفائی ملازم سنیل نے بتایا کہ صبح آٹھ بجے کے قریب جب وہ صفائی کے لئے پہنچا تو اے ٹی ایم کا شٹر گرا ہواتھا، اندر داخل ہونے پرپتہ چلا کہ اے ٹی ایم کٹا ہوا ہے جس کے بعد اس کی اطلاع اپنی آفس کودی، جہاں سے تھانے کو خبردینے کی بات کہی گئی۔
واضح رہے کہ اس سے قبل جنوری ماہ میں بھی مجرموں نے بودھ گیا میں دو مہان موڑ کے پاس اے ٹی ایم کاٹ کر قریب 26 لاکھ روپے کی چوری کی گئی تھی۔ جس کا اب تک انکشاف نہیں ہوا ہے۔ اے ٹی ایم ڈکیتی کا معاملہ اب تک کا دوسرا بڑا واقعہ ہے۔