ارریہ: شکست کے بعد ایل جے پی امیدوار کی اپنے ہی صدر پر تنقید

ریاست بہار کے ضلع ارریہ میں ریاستی اسمبلی انتخابات 2020 کے نتائج آنے کے بعد لوک جن شکتی پارٹی (ایل جے پی) کے رہنما نے اپنی ہی پارٹی کے خلاف سخت نکتہ چینی کی ہے۔

ارریہ اسمبلی حلقہ سے ایل جے پی کے امیدوار ببن سنگھ نے اپنی رہائش گاہ پر ایک پریس کانفرنس منعقد کر اپنی شکست کا ذمہ دار ایل جے پی کے ضلعی صدر اویناش کمار و دیگر عہدیداروں کو ٹھہرایا۔

ببن سنگھ نے ایل جے پی کے قومی صدر چراغ پاسوان کا شکریہ ادا کرتے ہوئے کہا کہ لوگ کہتے ہیں کہ ایل جے پی پاسوان گروہ کی پارٹی ہے مگر یہ غلط ہے جس کی مثال میں خود ہوں۔

انہون نے کہا کہ ایل جے پی ہر برادری اور ہر طبقہ کی پارٹی ہے۔

ببن سنگھ نے کہا کہ میرا سیاسی کیریئر طویل ہے، جس پارٹی میں رہا پوری ایمانداری سے اس کے منثور پر عمل کیا۔

ایل جے پی کو ارریہ ضلع میں ایک نئے طریقے سے زندہ کرنا میری پہلی ترجیح ہے، اپنی ہار کی وجہ بتاتے ہوئے ببن سنگھ نے کہا کہ یہاں جو بھی کارکنان ہمارے ساتھ تھے وہ میرے کارکنان تھے، پارٹی کے نہیں۔

پارٹی سطح پر جس طرح میری مدد ہونی چاہیے تھی اس طرح سے نہیں ہو پائی۔

انھوں نے کہا کہ مقامی سطح پر پارٹی کارکنان میں نااتفاقی ہے۔ایل جے پی کے ضلع صدر ہوں یا نائب صدر، کسی کی طرف سے مجھے کسی طرح کا کوئی تعاون نہیں ملا اور نہ انتخابات سے قبل منصوبہ بند طریقے سے کام ہوا۔

ببن سنگھ نے کہا کہ ارریہ کی ان عوام کا میں شکریہ ادا کرتا ہوں۔

ایل جے پی کے رہنما نے کہا میں نے ہمت نہیں ہاری ہے، شکست کے بعد ہی کامیابی ملتی ہے، ہم ایک بار پھر سے عوام کے درمیان جائیں گے اور ان کے دکھ درد میں شامل ہوں گے۔