بہار میں عازمین حج کی تعداد کم کیوں؟

بہار ریاستی حج کمیٹی کے چیئرمین محمد الیاس احمد کا کہنا ہے کہ بہار میں 12600 عازمین کا کوٹہ ہے مگرحج کا سفر مہنگا ہو جانے کی وجہ سے 6000 سے زائد افراد اس مقدس سفر پر نہیں جارہے ہیں۔

گذشتہ روز عازمین حج کے فارم پُر کرنے کی آخری تاریخ تھی، تاہم بہت کم تعداد میں حج فارم جمع ہونے کی وجہ سے اس میں 12 دنوں کی مزید توسیع کر دی گئی ہے۔

حج فارم پر کرنے کی تاریخ میں 12روز کی توسیع سے بہار, جھارکھنڈ , بنگال اور یوپی جیسے کئی ریاستوں کے عازمین کو بڑی راحت ملی ہے مرکزی حج کمیٹی نے آج دیر شام تاریخ میں توسیع کا اعلان کرتے ہوئے کہا کہ فارم پر کرنے کی آخری تاریخ 17 دسمبر مقرر کی ہے ۔

ریاستی حج کمیٹی کے چیرمین و مرکزی حج کمیٹی کے رکن محمد الیاس احمد عرف سونو بابو نے اس بار پورے ملک میں عازمین کی تعداد کم ہونے کی وجہ حج کو گراں قرار دیا ہے۔

بہار ریاستی حج کمیٹی کے چیئرمین نے ای ٹی وی بھارت سے خصوصی ملاقات میں کہا کہ انہوں نے مرکزی حج کمیٹی سے تاریخ میں توسیع کی اپیل کی تھی جس کے بعد تاریخ میں توسیع کا اعلان کیا گیا۔

انہوں نے کہا کہ اس بار 12 دنوں کی توسیع کے دوران ان وہ کوشش کریں گے کہ زیادہ سے زیادہ عازمین حج فارم پر کر سکیں۔

ان کا کہنا ہے کہ جن لوگوں کے ساتھ پاسپورٹ کا مسئلہ ہے ان کو بھی حل کیا جائے گا انہوں نے بتایا کہ بہار کا کوٹہ 12 ہزار 600 ہے جو کبھی بھی پوری نہیں ہوپاتی ۔

حج کمیٹی کو امید ہے کہ اس توسیع کی مدت میں وہ 6000 تک ضرور پہنچ جائیں گے ابھی ریاستی حج کمیٹی کو 4 ہزار 27 عازمین حج کی درخواست مل چکی ہے۔

چیئرمین نے عازمین کی تعداد میں کمی کو حج کی گرانی قرار دیتے ہوئے کہا کہ گزشتہ تین برسوں میں حج تقریبا ڈیڑھ لاکھ مہنگا ہوا ہے ۔

انہوں نے کہا کہ جب حج کے معاملات وزارت خارجہ کے تحت تھے اس طرح کی دشواریاں پیش نہیں آتی تھیں۔

انہوں نے کہاکہ سبسیڈی ہوائی جہاز کے کرایے پر تھی تھی نہ کہ مکہ مکرمہ اور مدینہ منورہ کے اخراجات پر بسڈی تھی۔