کشن گنج کا مرکز کہے جانے والے پشچم پالی چوک جہاں سے بہادر گنج، دگھل بینک، پواخالی، لوچا، برپور، بشنپور، کوچادھامن وغیرہ جانے کے لیے گاڑیوں کی لمبی قطاریں لگی ہوتی ہیں آج پوری طرح سے خالی رہیں۔
حالانکہ لاک ڈاؤن سے قبل اور دوسرے دن ایسا نظارہ نہیں تھا تب گاڑیوں کی آمد ورفت جاری تھی، دکانیں بھی کثیر تعداد میں کھلی ہوئی تھیں۔
لیکن وزیر اعظم نریندر مودی کی جانب سے لاک ڈاؤن کے اعلان کے بعد پولس و انتظامیہ کی جانب سے سختی برتی جارہی ہے۔
کشن گنج کے ایس پی کمار آشش نے اس تعلق سے ایک سرکولر جاری کیا ہے اور ساتھ ہی انھوں نے یہ اپیل بھی کی ہے کہ جو کوئی بھی شخص قانون کی خلاف ورزی کرےگا اس کے خلاف سخت کاروائی کی جائے گی یہی وجہ ہے کہ آج پشچم پالی سمیت پورے ضلع میں سناٹا چھایا رہا۔
واضح رہے کہ اس سے قبل ضلع کشن گنج میں کورونا وائرس کے دو مشتبہ مریض پائے گئے تھے لیکن ان کی میڈیکل رپورٹ نگیٹیو آئی تھی۔