کنیہا کمار نے سی اے بی کی مخالفت کی

کمیونسٹ پارٹی آف انڈیا کے رہنما کنہیا کمار اور کانگریس کے رہنما نے آج مومی شہریت ترمیمی بل کی مخالفت کرتے ہوئے بہار کی دارالحکومت پٹنہ میں مظاہرہ کیا۔

اس مظاہرے میں کانگریس کے رہنما شکیل احمد نے کنیہا کمار کا ساتھ دیا۔ اس موقع پر کانگریس اور سی پی آئی کے دیکر رہنما موجود رہے۔ یہ مظاہرہ سی پی آئی کے دفتر سے شروع ہو کر انکم ٹیکس گولمبر پر اختتام پزیر ہوا۔ یہاں ان رہنماؤں نے قومی شہریت ترمیمی بل جلا کر اس کی مخالفت کی۔

بل کی مخالفت کرتے ہوئے کنہیا کمار نے کہا کہ جو قانون لوک سبھا میں پاس کیا گیا ہے اس سے بھارتیہ جنتا پارٹی ملک کو دو حصوں میں تقسیم کرنا چاہتی ہے۔

انہوں نے کہا کہ اس بل کو پاس کرنے کا مقصد یہ ہے کہ بی جے پی ہندو مسلمان کے نام پر ملک کو تقسیم کرنا چاہتی ہے۔ انہوں نے کہا کہ پورا ملک گاندھی جی کی 150 وی یوم پیدائش منا رہا ہے وہیں ساورکر کے ماننے والے لوگ آج جناہ کے خوابوں کو پورا کر رہے ہیں۔

انہوں نے کہا کہ حکومت اپنی ناکامیوں کو چھپانے کے لیے اس طرح کے بل لا رہی ہے، جس سے جو ترقی کا ڈھنڈھورا پیٹا گیا ہے اسے چھپایا جا سکے۔

کنہیا نے این آر سی بل کو تباہ کن بتایا۔ انہوں نے کہا کہ اس بل کی مخالفت پورے ملک میں ہو رہی ہے۔ کنہیا کمار نے بہار کی عوام سے اپیل کی ہے کہ وہ اس بل کی مخالفت کریں۔

خیال رہے کہ پارلیمان کے ایوانِ زیریں نے تارکینِ وطن کی شہریت سے متعلق متنازع ترمیمی بل کثرتِ رائے سے منظور کر لیا ہے۔

لوک سبھا نے متنازعہ ترمیمی بل کی منظوری پیر کی رات کو کی۔ اس بل کے حق میں 311 ووٹ آئے جبکہ اس کی مخالفت میں 80 ووٹ پڑے۔

اس مسودۂ قانون کے تحت بنگلہ دیش، پاکستان اور افغانستان سے انڈیا آنے والے ہندو، بودھ، جین، سکھ، مسیحی اور پارسی مذہب سے تعلق رکھنے والے غیر قانونی تارکین وطن کو شہریت دینے کی تجویز دی گئی ہے لیکن اس میں مسلمانوں کو شامل نہیں کیا گیا ہے۔