جمعیت العلماء ارریہ کی جانب سے سیلاب متاثرین کے لیے امداد

بہار میں آئے خوفناک سیلاب کے سبب ریاست کے تقریباً 55 لاکھ افراد متاثر ہوئے ہیں۔ اس سلسلے میں جمعیت العلمأ ارریہ نے سیلاب متاثرین کے لیے امداد فراہم کیں۔

جمعیت العلمأ ارریہ کے ضلع صدر ڈاکٹر عابد حسین نے اس تعلق سے بتایا کہ ضلع ارریہ میں جمعیت کے کارکنان اور اس سے وابستہ افراد سے امداد جمع کرکے سیلاب زدگان کو پہنچا رہے ہیں۔ اور جمعیت کے اراکین الگ الگ علاقوں کا دورہ بھی کریں گے۔

ڈاکٹر عابد حسین نے یہ بھی بتایا کہ' اس کے بعد جیسے جیسے امداد میں اضافہ ہوگا جمعیت کے اراکین سیلاب سے متاثرہ دیگر علاقوں میں بھی پہنچ کر راحت رسانی کا کام کریں گے اور اس کام کے لیےکارکنان پوری طرح سے تیار ہیں'۔

جمعیۃ کے ضلع جنرل سکریٹری مفتی اطہر القاسمی نے کہا کہ 'ریاست میں جب ہر سال سیلاب آتا ہے تو پھر انتظامیہ اس سے نمٹنے کے لیے پہلے ہی تیاری کیوں نہیں کر لیتی اور اس تباہی سے بچنے کے لیے حکومت سخت قدم کیوں نہیں اٹھاتی'۔

انھوں نے مزید کہا کہ' اس سیلاب میں درجنوں افراد کی موت ہوئی، ہزاروں لوگ بے گھر ہوگئے کتنے مویشیوں کی جانیں چلی گئیں لیکن حکومت کا اس معاملے میں نہایت سست رویہ رہا ہے'۔