ریاست بہار کے دارالحکومت پٹنہ میں واقع امارت شرعیہ کے دفتر پہنچے جمعیت العلماء ہند کے قومی جنرل سکریٹری مولانا حکیم الدین قاسمی نے کہا کہ امارت شرعیہ ایک دستوری ادارہ ہے جو گزشتہ سو سال سے بہار اڑیسہ اور جھارکھنڈ کے مسلمانوں کی نمائندگی کر رہا ہے۔
انہوں نے کہا کہ یہ دینی، ملی، تحریکی و شرعی تنظیم ہے۔ جس نے مسلمانوں کی ہر سمت میں رہنمائی کی ہے۔ یہاں کے اکابرین و امراء شریعت نہ صرف ان تین صوبوں میں بلکہ قومی و عالمی پیمانے پر بھی عزت و احترام کی نگاہ سے دیکھے اور سنے جاتے ہیں۔
امارت شرعیہ آنے پر مولانا حکیم الدین قاسمی نے خوشی کا اظہار کیا۔
قومی جنرل سکریٹری کی آمد پر نائب امیر شریعت حضرت مولانا شمشاد رحمانی قاسمی نے ان کا استقبال کیا قومی جنرل سکریٹری نے نائب امیر شریعت سے یہاں انجام پانے والے دیگر امور کے بابت معلومات بھی حاصل کی اور اس کی تحسین بھی کی۔
مولانا شمشاد رحمانی قاسمی نے کہا کہ امارت شرعیہ اور جمعیت العلماء کے روابط بہت قدیم اور مضبوط ہیں۔ دونوں اداروں کے بزرگوں کے درمیان ہمیشہ قدر و احترام کا معاملہ رہا ہے۔ آج بھی یہ روایت قائم ہے اور آپسی تبادلہ خیال ہوتا رہتا ہے۔ ملک گیر سطح پر جمعیت العلماء ہند کی خدمات اور کاوش ہم سبھوں کے سامنے ہیں۔ اللہ ایسے تمام اداروں کی حفاظت فرمائے جو دین و ملت کی بے لوث خدمت کر رہے ہیں۔
اس موقع پر جمعیت العلماء کے کئی ذمہ داران بھی موجود تھے۔
