کیمور: قباٸلی علاقوں میں جاری اسکیمز کا معاٸنہ

معائنہ کے بعد وزیر نے ناراضگی کا اظہار کرتے ہوئے کہا کہ ادھورا بلاک میں چلائی جا رہی فلاحی اسکیمز میں بد عنوانی عروج پر ہے۔

ریاست بہار کے کیمور کے ادھورا بلاک کے قبائلی علاقوں میں ریاستی حکومت کی جانب سے چلائی جا رہی فلاحی اسکیمز کا آج اقلیتی فلاح کے وزیر محمد زماں خان نے معائنہ کیا۔

معائنہ کے بعد وزیر نے ناراضگی کا اظہار کرتے ہوئے کہا کہ ادھورا بلاک میں چلائی جا رہی فلاحی اسکیمز میں بد عنوانی عروج پر ہے۔

انہوں نے افسران اور عوامی نمائندگان پر الزام عاٸد کرتے ہوئے کہا کہ اس کی شکایت وزیر اعلی نتیش کمار تک کی جائےگی۔ وزیر اعلی کی سب سے بڑی اسکیم 'سات نشچے' کے تحت چلنے والے نل جل، سڑک، اسکول بلڈنگ سمیت سبھی اسکیمز بدعنوانی کا شکار ہو گئی ہیں۔

بتا دیں کہ ریاست کے وزیر محمد زماں خان کا تعلق کیمور ضلع سے ہے اور چین پور اسمبلی حلقہ کے وہ رکن اسمبلی ہیں۔ پورے ریاست میں چین پور اسمبلی حلقہ سب سے بڑا علاقہ ہے، جس میں چاند بلاک، ادھورا بلاک، بھگوانپور بلاک اور چین پور بلاک کا علاقہ آتا ہے۔

یہ اسمبلی حلقہ پسماندگی کا شکار رہا ہے۔ جس میں ادھورا چین پور اور بھگوان پور کے علاقے میں بیشتر آبادی قبائلی ہے اور یہ پورا علاقہ 'ون سنچری ایریا' مانا جاتا ہے۔

پورے ریاست کے ساتھ ادھورا بلاک بھی وزیر اعلی کے ذریعہ چلائی جانے والی بڑے منصوبے والی اسکیم 'سات نشچے' میں شامل ہے لیکن بتایا جاتا ہے کہ یہاں بدعنوانی عروج پر ہے۔