گیا میں شدید سردی کی وجہ سے عام زندگی پریشان ہے

ضلع گیا بہار میں چار دنوں سے سب سے کم درجہ حرارت والا ضلع قرار دیا گیا ہے، تاہم اتنی سردی کے باوجود انتظامیہ کی جانب سے خاطر خواہ اقدامات نہیں کیے گئے ہیں حالانکہ ای ٹی وی بھارت اردو کی خبر کے بعد شہر کے کچھ اہم پوائنٹس پر الاؤ جلانے کے انتظامات میونسپل کارپوریشن کی طرف سے کیے گئے ہیں۔

بہار میں گزشتہ پانچ دنوں سے سخت سردی پڑ رہی ہے، جس سے معمولات زندگی درہم برہم ہوگئی ہے۔ محکمہ موسمیات نے ضلع گیا سمیت کئی اضلاع میں 23 دسمبر تک کولڈڈے کا الرٹ جاری کیا ہے۔

گیا میں آئندہ چار پانچ دنوں تک درجہ حرارت معمول سے کم رہنے کی بات محکمہ موسمیات کی جانب سے کی گئی ہے۔ حالانکہ سخت سردی کے موسم میں بھی انتظامیہ بچاؤ کے انتظامات کو لیکر حساس نہیں ہے۔

ای ٹی وی بھارت اردو نے گیا میں سردی سے بچاؤ کے انتظامات اور کمیوں پر مسلسل اہتمام کے ساتھ خبر شائع کی ہے اور اس کی خبر کا اثر بھی ہواہے۔ اہم پوائنٹس پر الاؤ جلانے کا نظم کیا گیاہے۔

آج رات پھر ای ٹی وی بھارت اردو کی ٹیم نے شہر کے گاندھی میدان علاقے کا جائزہ لیا ہے۔ رین بسیرا کے پاس موجود کچھ افراد الاو 'آگ' تاپتے نظر آئے، پوچھے جانے پر بتایا کہ گزشتہ دو دنوں سے کچھ مقامات پر الاؤ جلانے کے نظم کیے گئے ہیں۔

میونسپل کارپوریشن کی جانب سے روزانہ پندرہ کلو کے قریب لکڑیاں لاکر جلانے کے لیے دی جاتی ہیں، شام سات بجے سے الاؤ رین بسیرا کے پاس جلتا ہے اور قریب دس بجے تک یہ سلسلہ جاری ہوتا ہے۔

گیا میں شدید سردی

الاو کے پاس کھڑے ٹیمپو ڈرائیور اوم پرکاش نے بتایا کہ گزشتہ دن سے کچھ جگہوں پر الاو جلانے کا آغاز ہوا ہے حالانکہ ابھی تک اسٹیشن اور بس اسٹینڈ پر انتظامیہ اور میونسپل کارپوریشن کی طرف سے انتظامات نہیں کیے گئے ہیں، مزید بہتر انتظامات ہوسکتے تھے تاہم کیا نہیں گیا ہے۔

واضح رہے کہ گیا کا کم سے کم درجہ حرارت 4.2 ڈگری اور زیادہ سے زیادہ 21.5 ڈگری سینٹی گریڈ ریکارڈ کیا گیا ہے۔ پیر اور اتوار کو بھی کم سے کم درجہ حرارت 4.3 اور زیادہ سے زیادہ 21 ڈگری سینٹی گریڈ ریکارڈ کیا گیا ہے جبکہ سنیچر کے روز اس سال کا ابھی تک کا سرد رہا ہے۔ سنیچر کو کم سے کم درجہ حرارت 3. 6 ڈگری رہا ہے۔