گیا: شبنم پروین کو مرکزی حکومت نے اعزاز سے نوازا

ریاست بہار کے گیا کی شبنم پروین کو قومی ادارہ برائے دیہی ترقیات اور پنچایتی راج وزارت نے ایوارڈ سے نوازا ہے۔ شبنم پروین ایک مخصوص خاتون ہیں، تاہم انہوں نے جیویکا کی مدد سے روزگار میں نمایاں کامیابی حاصل کی ہے۔

بہار کے گیا میں آزادی کا امرت مہوتسو کے موقع پر " ہنر باز ایوارڈ " تقریب منعقد ہوئی۔ یہ تقریب قومی ادارہ برائے دیہی ترقی اور پنچایتی راج وزارت کی جانب سے پنڈت دیندیال اپادھیائے کے یوم پیدائش پر منعقد کی گئی۔

تقریب ورچوئل طور پر منعقد ہوئی جس میں مجموعی طور پر 9 مختلف مخصوص امیدواروں کو اپنا کاروبار کرنے کے لیے ایوارڈ دیا گیا۔ یہ افراد دیہی سیلف ایمپلائمنٹ اور ٹریننگ انسٹی ٹیوٹ سے ٹریننگ حاصل کرنے کے بعد اپنے روزگار میں مشغول ہیں۔

ضلع گیا سے شبنم پروین اس ایوارڈ کے لیے منتخب ہونے والی بہار کی واحد امیدوار تھیں۔ انہیں وزارت دیہی ترقی کی طرف سے ایوارڈ، توصیفی سند اور میڈل دے کر اعزاز سے نوازا گیا۔

شبنم پروین کو گیا میں ڈسٹرکٹ پروجیکٹ منیجر مکیش کماراور پنجاب نیشنل بینک کے ڈویژنل ہیڈ سبودھ کمار کے ہاتھوں ایوارڈ سے سرفراز کیا گیا۔

واضح ہو کہ ضلع گیا کے موہن پور کی شبنم پروین ایک معذور خاتون ہیں اور نورا جیویکا دیویانگ سیلف ہیلپ گروپ کی صدر ہیں۔

انہوں نے جیویکا کے ذریعے ضلع گیا میں پنجاب نیشنل بینک کے زیر انتظام دیہی سیلف ایمپلائمنٹ ٹریننگ انسٹی ٹیوٹ کے ذریعے موم بتی کی پیداوار کی تربیت حاصل کرکے اپنے کاروبار کا آغاز کیا ہے۔

ڈیزائنر موم بتیاں ان کے ذریعہ تیار کی جاتی ہیں اور دوسری جگہوں سے آرڈر ملنے پر سپلائی بھی کی جاتی ہے۔ آج شبنم پروین دیگر مقامات پر ٹریننگ دینے کا کام بھی کر رہی ہیں۔