بہار کے گیا میں رہنے والے ایک خاندان نے بتایا کہ پولیس کی جانب سے کی گئی جانچ میں ان کی بے گناہی ثابت ہونے کے باوجود ابھی تک انہیں انصاف نہیں ملا ہے۔
اطلاعات کے مطابق 2015 میں این سی بی کے افسران نے گیا کے بارہ چٹی میں چھاپہ ماری کی تھی اور ایک خاندان کو مبینہ طور پر فرضی مقدمہ میں پھنسانے کی کوشش کی تھی۔ اس وقت کے ایس ایس پی اور سٹی ایس پی نے اس سلسلہ میں تحقیقات کرکے این سی بی کی کاروائی کو فرضی قرار دیا تھا۔
5 سال کا عرصہ گذرنے کے باوجود ابھی تک متاثرہ خاندان کو انصاف نہیں مل سکا۔ پولیس جانچ میں اس بات کا انکشاف ہوا تھا کہ بارہ چٹی تھانہ کے کاہو داغ گاؤں میں جی ٹی روڈ پر واقع ایک مکان میں رانچی این سی بی کی ٹیم نے کوشلیا دیوی کے مکان پر چھاپہ مارا تھا جس کے بعد کوشلیا دیوی نے مقامی پولیس کو اس کی اطلاع دی اور ایف آئی آر درج کروایا۔
ایس ایس پی منو مہاراج نے سٹی ایس پی اوکاش کمار کی نگرانی میں جانچ کا حکم دیا تھا۔ تحقیقات میں این سی بی کی کاروائی کو فرضی پایا گیا تھا تب سے متاثرہ خاندان پر کیس واپس لینے کے لیے بھی ڈباؤ ڈالا جارہا ہے۔
خاندان نے مزید بتایا کہ این سی بی کی مرکزی ٹیم نے بھی فرضی چھاپہ ماری کی تصدیق کی ہے۔ وہیں، ایس ایس پی ادتیہ کمار نے بتایا کہ جانچ مکمل ہوچکی ہے۔ چونکہ معاملہ سرکاری افسران سے جڑا ہے اس لیے چارج شیٹ داخل کرنے کی اجازت طلب کی گئی تھی۔