نتیش کمار بی جے پی کے چنگل میں پھنس گئے ہیں: علی انور انصاری

سابق راجیہ سبھا رکن علی انور انصاری نے نتیش کمار پر طنز کرتے ہوئے کہا کہ وہ کبھی بھی مسلمانوں کے ہمدرد نہیں رہے ہیں۔ اس بار وہ بی جے پی کے جال میں پھنس گئے ہیں۔ انہوں نے کہا کہ اگر ہمت ہے تو وہ وہاں سے نکلیں۔

سابق راجیہ سبھا رکن علی انور انصاری نے موجودہ حکومت اور اسمبلی کے اراکین کے طرزِ عمل پر طنز کرتے ہوئے کہا کہ ان لوگوں نے آئینی اور جمہوری طرز کو تار تار کر دیا ہے۔ اسمبلی اجلاس کے دوران اسپیکر کو انگلی دکھا کر دھمکی بھرے لہجے میں بات کرنا اصل میں جس تہذیب کے پروردہ ہیں، ویسا ہی عمل کر رہے ہیں۔

انہوں نے قانون ساز کونسل میں مسلمانوں کو جگہ نہیں دیے جانے کے متعلق کہا کہ ان سے مسلمانوں کو کوئی امید کرنا بے معنی ہے۔

ہم نے جب بغاوت کیا تھا اسی وقت کہا تھا کہ ان کو اب مسلمان ووٹ نہیں دیگا۔ ان کا ایک بھی مسلم ایم ایل اے نہیں جیتا۔ مسلمان کو کوئی توقع نہیں رکھنی چاہیے، جب یہ دوبارہ بی جے پی میں گئے اسی وقت صاف ہوگیا تھا کہ مسلمان ان کے ساتھ نہیں ہے۔ انہوں نے دوسری پارٹی سے توڑ کر مسلمان کو لایا۔

علی انور انصاری نے کہا کہ بی جے پی اور جے ڈی یو کے درمیان رشتہ بہتر نہیں ہے۔ وزیراعلیٰ نتیش کمار بری طرح پھنس گئے ہیں۔ ان کے اندر بے چینی ہے، لیکن کچھ کر نہیں سکتے۔ انہوں نے کہا کہ اب بھی وقت ہے نکلیں وہاں سے۔

مکیش سہنی اور جیتن رام مانجھی کے سوال پر انہوں نے کہا کہ ان کی کوئی حیثیت نہیں ہے۔ یہ موقع پرست لوگ ہیں۔ سودے بازی کرنا چاہتے ہیں۔

اوپندر کشواہا کے متعلق انہوں نے کہا کہ ان کے ساتھ آنے سے کوئی فرق نہیں پڑے گا۔ کشواہا برادری کے لوگ نتیش کمار کے خلاف ہیں۔