گیا: نئے سال کے موقع پر پھولوں کے تاجر پریشان رہے

بہار کے ضلع گیا میں بھی سال 2021 کے پہلے دن کاجشن رہا، تاہم زیادہ تر لوگوں نے سادگی کے ساتھ سال نو کا جشن منایا اور ایک دوسرے کو مبارکباد پیش کی۔ پھول اور گلدستوں کی تجارت پر سال نو کے جشن سے زیادہ کورونا وائرس کا اثر رہا، جس سے پھول کی تجارت کرنے والوں کو نقصان پہنچا ہے۔

نئے سال کے موقع پر لوگ ایک دوسرے کو گلاب کی کلیاں تحفے میں پیش کرنے کے لئے مارکیٹ کا رُخ کرتے ہیں حتیٰ کہ چوراہوں پر بھی آپ کو پھول اور گلدستے خریدنے والوں کی بھیڑ دور سے ہی نظر آ جائے گی۔

نئے سال پر گلاب اور دیگر بہت سی اقسام کے پھول آپ کو لوگوں کے ہاتھوں میں نظر آئیں گے تاہم اس مرتبہ پھولوں کی دکانوں پر خاموشی چھائی رہی۔ لوگوں نے نئے سال کا جشن تو منایا لیکن سادگی کے ساتھ اپنے اپنے انداز میں۔ ایک دوسرے کو مبارکباد پیش کی گئی تاہم ذریعہ سوشل میڈیا ہی رہا۔

دکانداروں نے بتایا کہ ایسی حالت کبھی نہیں ہوئی تھی۔ قسم قسم کے پھول منگوا کر رکھ لیے نئے سال کے موقع پر پھولوں کی کمی نہیں ہو تاہم خریداروں کا پتہ نہیں ہے۔

ایک دکاندار پنٹو نے بتایا کہ طرح طرح کے پھول پہلے سے ہی اسٹاک کرالیے گئے تھے تاہم اس مرتبہ کسی نے بھی بڑے پروگرام کے لیے پھول کے لیے آرڈر بک نہیں کرایا ہے۔

پھولوں کے تاجر پریشان

ایک اور دوکاندار وجے مالاکار نے نئے سال کے موقع پر پھولوں کی خریداری نہیں ہونے پر کہا کہ اسکول کالجز، کوچنگ اور دیگر ادارے کے ساتھ کئی طرح کی بندش لگائی گئی ہے جس کی وجہ سے کسٹمر گھروں سے باہر نہیں نکلے۔

واضح رہے کہ کورونا وبا کو لے کر کئی طرح کی بندشوں کی وجہ سے سیاحتی مقامات پر بھی بھیڑ نہیں لگی۔ کچھ لوگ ہی پکنک اسپاٹ پر نظر آئے، جس کی وجہ سے تجارتی علاقے پر بھی اثرات رہے ہیں۔