لاک ڈاﺅن: فلم کی شوٹنگ کرنے پر سابق رکن پارلیمنٹ سمیت 61 پر ایف آئی آر

علاقہ میں فلم کی شوٹنگ کی جارہی تھی اور لوگوں کی بھیڑ جمع تھی۔ فلم کی شوٹنگ فوراً روک دی گئی اور کیمرہ اور دیگر سازوسامان کو ضبط کرلیا گیا۔

بہار میں سپول ضلع کے پپرا تھانہ علاقہ میں لاک ڈاﺅن کے باوجود فلم کی شوٹنگ کرنے کے ایک معاملے میں سابق رکن پارلیمنٹ وشو موہن کمار سمیت 61 لوگوں کے خلاف ایف آئی آر درج کی گئی ہے۔

سپول کے پولیس سپرانٹنڈنٹ منوج کمار نے آج بتایا کہ اطلاع ملی تھی کہ کورونا وائرس کے پھیلاﺅ کو روکنے کے مقصد سے ملک بھر میں نافذ لاک ڈاﺅن کے باوجود کٹیا اور رتولی گاﺅں میں ایک بھوجپوری فلم کی شوٹنگ کی جارہی ہے۔ معاملے کی تصدیق کے بعد ان کی قیادت میں پولیس ٹیم نے کٹیا گاﺅں واقع سابق رکن پارلیمنٹ وشو موہن کمار کی رہائش پر چھاپے ماری کی۔

اس دوران دیکھا گیا کہ وہاں فلم کی شوٹنگ کی جارہی ہے اور لوگوں کی بھیڑ جمع ہے ۔ فلم کی شوٹنگ فوراً روک دی گئی اور کیمرہ اور دیگر سازوسامان کو ضبط کرلیا گیا۔

پولیس سپرنٹنڈنٹ نے بتایاکہ اس سلسلے میں کٹیا کے سرکل افسر راجیو کمار نے سابق رکن پارلیمنٹ وشو موہن کمار اور 60دیگر کے خلاف ایف آئی آر درج کرائی ہے۔